[街頭小食] 片糖煨蕃薯

又黎焗爐食譜 , 由細到大袁太都好鐘意食煨蕃薯 , 當秋涼或天氣凍到震的時候 , 屋企附近總有一檔流動煨蕃薯 , 不過買一條都要成廿幾蚊 , 真係好點兒貴喎 , 其實大家有冇想過 , 自己在家動手都可以整到好味的煨蕃薯 ???



天氣寒冷時就話有流動蕃薯檔姐 , 不過夏天想食就一定要自己動手做 , 夏天熱死辣辣何來搵到煨蕃薯檔呢 , 剛巧某日見街市的雞蛋黃蕃薯做特價 , 10蚊有3包

袁太當然唔執輸買幾包回家 , 當然要整最愛的煨蕃薯做下午茶 , 其實呢個煨蕃薯做法 , 係某日陪袁生去圖書館搵設計書時 , 無無聊聊去睇烹飪書 , 睇左一本關於香港地道小食的書 , 入面居然有煨蕃薯的食譜 , 仲要係簡單到可以用焗爐整 , 而且材料只需要蕃薯 , 片糖  , 水同錫紙就可以 , 咁鬼簡單的材料就可以整到香港地道小食 , 袁太一直都好想試做



當日用左大約兩個鐘頭時間製作 , 過程其實相當簡單  , 比較麻煩只係每15分鐘要將蕃薯兩面掃上片糖水 , 片糖水呢個步驟一定唔可以唔做 , 因為片糖水係整個煨蕃薯的靈魂所在 , 當蕃薯皮掃左片糖水再放入焗爐焗 , 就會變成街檔香噴噴煨蕃薯的焦香味



袁太一路焗一路聞到好香的煨蕃薯味 , 焗好的煨蕃薯同街檔的味道有90%相似 , 係焗爐焗好熱辣辣即刻食 , 需要燙口 , 但絕對超正 , 袁生見我連街檔的煨蕃薯都整到 , 話真係要寫個服字俾袁太呢 ^^

材料 : 雞蛋黃橙心蕃薯(大家喜愛都可以轉用黃心或紫心) , 片糖 , 錫紙 , 水 , 叉 , 掃 , 黑芝麻

蕃薯用水沖洗乾淨 , 用毛巾抹乾水份放入煲內 , 加入片糖及1200ml水 , 用中火煮至片糖完全溶化 , 蓋上蓋轉慢火煮20分鐘 , 將蕃薯反一反另一面 , 蓋上蓋繼續用慢火煮20分鐘後熄火焗10分鐘 

    
焗10分鐘後將蕃薯盛起 , 煮蕃薯的片糖水留起 , 蕃薯用毛巾抹乾 , 用叉係蕃薯表面拮幾下(到時掃片糖水時就可以入味d) , 焗爐用250C預熱10分鐘

焗盤放上錫紙 , 再放上蕃薯 , 入焗爐用250C上下火焗45分鐘 , 蕃薯焗15分鐘後將蕃薯從焗爐取出 , 掃上一面片糖水後反轉另一面再掃上片糖水 , 再放入焗爐繼續焗 

15分鐘後又將蕃薯從焗爐取出 , 同樣兩面掃上片糖水 , 再放入焗爐繼續焗 , 直至焗好45分鐘即可 

材料
雞蛋黃橙心蕃薯(大家喜愛都可以轉用黃心或紫心)10個 , 片糖3磚 , 錫紙 , 水1200ml , 叉 , 掃 , 黑芝麻(拌蕃薯食,可省略)

做法

1. 蕃薯用水沖洗乾淨 

2. 用毛巾抹乾水份放入煲內 , 加入片糖及1200ml水 

3. 用中火煮至片糖完全溶化  , 蓋上蓋轉慢火煮20分鐘 

4. 將蕃薯反一反另一面 , 蓋上蓋繼續用慢火煮20分鐘後熄火焗10分鐘  

5. 焗10分鐘後將蕃薯盛起 , 煮蕃薯的片糖水留起 

6. 蕃薯用毛巾抹乾 , 用叉係蕃薯表面拮幾下(到時掃片糖水時就可以入味d) 

7. 焗爐用250C預熱10分鐘

8. 焗盤放上錫紙 , 再放上蕃薯 , 入焗爐用250C上下火焗45分鐘 

9. 蕃薯焗15分鐘後將蕃薯從焗爐取出 

10. 掃上一面片糖水後反轉另一面再掃上片糖水 , 再放入焗爐繼續焗 

11.15分鐘後又將蕃薯從焗爐取出 , 同樣兩面掃上片糖水 , 再放入焗爐繼續焗 

12. 直至焗好45分鐘即可 




熱辣辣的煨蕃薯 , 無論天氣炎熱或寒冷 , 都一樣咁好味 , 食時灑上少許黑芝麻仲好味添呢 ^^