2018年8月6日 星期一

[素羹] 西芹蘑菇粟米豆腐羹




中式羹有好多種 , 牛肉羹 , 海鮮羹 , 素翅羹 , 魚肉羹等等 ... 不過我最愛的中式羹都係佢 ~粟米羹~ , 粟米羹我一向好簡單 , 用粟米蓉 , 粟米粒加雞湯 , 加百福豆腐同魚肚 , 煮埋一窩就飲得 , 不過都係個句 , 而家唔食得雞 , 所以咩雞精 , 雞粉 , 雞湯統統都唔用得 ......



何況我今次想整個素羹 , 所以就簡單加入水去煮 , 照以往用粟米蓉 , 粟米粒去烹調 , 不過豆腐就換上雞蛋豆腐 , 又黎用豆漿同雞蛋自家製 , 另外再加上西芹同白蘑菇做配料 , 當然唔少得蛋液拌勻煮成羹狀 , 一路煮袁生一路同我講 , 妳連煮粟米羹都用咁多料 , 真係服左妳囉 , 如果妳去開餐廳 , 一定蝕死妳 , 煮咩都咁多料 , 係 ... 係 ... 係 ... 所以我咪唔開餐廳 , 只係做你的御用家廚囉 , 咁得未



其實話袁太煮野用多料 , 唔係得袁生咁講 , 袁太呀爹都講過袁太每次煮野都咁足料 , 好難會食得番出面街的野喎 , 都唔知係佢地講得誇張 , 還是我真係每次都咁足料炮製所致呢 ^^



材料 : 粟米蓉 , 白蘑菇 , 雞蛋 , 無糖豆漿 , 新鮮粟米 , 鹽 , 胡椒粉 , 西芹 , 蔥 , 隔篩 , 水 




三隻雞蛋打入大碗內 , 加入鹽及無糖豆漿拌勻 , 蒸盆放上一層保鮮紙 , 將豆漿蛋液用篩網隔去多餘泡沫及雜質 , 放入電蒸鍋內蓋上蓋先蒸2分鐘 , 2分鐘後用筷子將鑊蓋留縫隙(可避免蒸來的豆腐過老或變火山口) , 再蒸25分鐘 



















蒸好的雞蛋豆腐待涼 , 新鮮粟米去外皮及粟米鬚 , 放入電蒸鍋內蓋上蓋蒸20分鐘 , 期間將西芹去纖維切粒 , 白蘑菇切片 , 將西芹粒放入煲內 , 加少許鹽及油 , 加水浸過面用中火煮滾 , 將西芹粒盛起瀝乾 , 粟米蒸好將粟米起粒 , 蔥切粒及幼絲 , 白蘑菇片放入鑊中加少許鹽拌勻炒數分鐘至軟身


















待涼的雞蛋豆腐切粒 , 放入大碗內加冰水浸10分鐘 , 餘下的兩隻雞蛋拌勻成蛋液 , 期間將粟米蓉放入煲內 , 逐一加入粟米粒 , 西芹粒及白蘑菇片 , 加入2500ml水拌勻 , 用中火煮至微滾後盛起面上泡泡去掉 , 拌一拌勻煲內材料再煮滾 , 蓋上蓋繼續用中火煮30分鐘 , 期間小心滾瀉 , 雞蛋豆腐浸10分鐘後瀝乾水份

























30分鐘後將雞蛋豆腐及蛋液放入粟米羹內拌勻 , 蓋上蓋轉慢火煮10分鐘 , 最後加少許鹽及胡椒粉調味拌勻 , 熄火焗10分鐘即可

















材料
粟米蓉2盒 , 白蘑菇 , 雞蛋5隻 , 無糖豆漿300ml , 新鮮粟米1條 , 鹽 , 胡椒粉 , 西芹1/2扎 , 蔥 , 隔篩 , 水2500ml
 


做法
1. 三隻雞蛋打入大碗內 , 加入鹽及無糖豆漿拌勻 

2. 蒸盆放上一層保鮮紙 

3. 將豆漿蛋液用篩網隔去多餘泡沫及雜質 , 放入電蒸鍋內蓋上蓋先蒸2分鐘 

4. 2分鐘後用筷子將鑊蓋留縫隙(可避免蒸來的豆腐過老或變火山口) 

5. 再蒸25分鐘  

6. 蒸好的雞蛋豆腐待涼 

7. 新鮮粟米去外皮及粟米鬚 , 放入電蒸鍋內蓋上蓋蒸20分鐘 

8. 期間將西芹去纖維切粒 , 白蘑菇切片 

9. 將西芹粒放入煲內 , 加少許鹽及油 , 加水浸過面用中火煮滾 , 將西芹粒盛起瀝乾 

10. 粟米蒸好將粟米起粒 , 蔥切粒及幼絲

11. 白蘑菇片放入鑊中加少許鹽拌勻炒數分鐘至軟身 

12. 待涼的雞蛋豆腐切粒 , 放入大碗內加冰水浸10分鐘 

13. 餘下的兩隻雞蛋拌勻成蛋液 

14. 期間將粟米蓉放入煲內 , 逐一加入粟米粒 , 西芹粒及白蘑菇片 , 加入2500ml水拌勻 

15. 用中火煮至微滾後盛起面上泡泡去掉 , 拌一拌勻煲內材料再煮滾 

16. 蓋上蓋繼續用中火煮30分鐘 

17. 期間小心滾瀉 , 雞蛋豆腐浸10分鐘後瀝乾水份

18. 30分鐘後將雞蛋豆腐及蛋液放入粟米羹內拌勻 , 蓋上蓋轉慢火煮10分鐘

19. 最後加少許鹽及胡椒粉調味拌勻 , 熄火焗10分鐘即可 




呢個素羹雖然只係加水煮 , 冇用雞湯 , 但味道十分好 , 我會俾滿分呢 ^^








20 則留言:

  1. 你煮乜都一絲不苟,好佩服你,你的家人有口福。

    回覆刪除
  2. 粟米更我好鍾意煮,但材料就簡單好多喇。

    回覆刪除
  3. 好足料呀袁太, 肥人真係望塵莫及呀呀呀呀...

    回覆刪除
  4. 袁太煲粟米羹都咁足料,袁生真係好幸福

    回覆刪除
  5. 每次見到雞蛋豆腐都覺得好滑

    回覆刪除
  6. 我超愛粟米羹

    回覆刪除
  7. 雞蛋豆腐真係好易配搭呀

    回覆刪除
    回覆
    1. 係呀,煮湯得,煮餸得,攞去炸又得,好百搭呢

      刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......