[豬手兩食 ] 黑椒蜜糖焗豬手 , 青紅蘿蔔粟米豬手湯

最近多數用美的智能高速鍋煮食 , 有半個月冇開焗爐 , 平時見急凍豬手做特價 , 一定會買幾隻放入冰箱做存貨 , 閒時就拎隻豬手解凍 , 出水再煲下佢 , 雪凍切片就食得 , 好鬼方便 , 本應想整隻黎食下 , 點知當日袁生有雞雞做晚餐 , 佢又話唔想食咁多肉 , 所以就打消念頭 , 直至前幾日 ......



個腦一片空白 , 冇咩靈感晚餐煮咩好 , 突然醒起雪櫃仲有豬手 , 快快手攞出黎解凍 , 解凍放入煲 , 加水 , 白胡椒粒 , 白醋 , 香葉煮佢45分鐘 , 然後將豬手盛起風乾一陣 , 再用啤酒浸下隻豬手 , 啤酒一定要選擇麥啤 , 唔好問我點解 , 皆因袁太上網搵既 , 好多網友都話買麥啤要有"Hefe-WeiBbier"呢個字樣 , 去左幾間超市得一間先有得賣 , 真係好彩

當豬手浸完啤酒浴之後就可以入爐焗 , 睇落看似簡單 , 不過呢個豬手足足整左成五個半鐘時間 , 不過焗好後味道超正 , 黑胡椒同蜜糖的味道超夾 , 而且豬皮還有淡淡的啤酒香味 , 當小食 , 拌飯 , 拌麵都一流 , 以往整煲豬手的水袁太都會掉左佢 , 現在真的覺得自己好笨笨豬同好浪費 , 所以煲豬手的水就配左青紅蘿蔔 , 粟米 , 蜜棗南北杏煲個湯 , 呢個豬手兩食袁生非常滿意呢 ^^

 

材料 : 急凍豬手 , 白胡椒粒 , 香葉 , 黑胡椒碎 , 青蘿蔔 , 紅蘿蔔 , 白醋 , 粟米 , 蜜糖 , 麥啤 , 錫紙 , 掃 , 叉 , 蜜棗 , 南北杏 , 膠袋

豬手解凍沖洗乾淨 , 抹乾水份放入煲內 , 加入白胡椒粒 , 香葉及白醋 , 加適量水(水的份量蓋過豬手即可) , 用中火煲至滾後 , 繼續用中火煲45分鐘(期間不需要蓋上煲蓋 , 煲約一半時間左右將豬手反轉另一面繼續煲) , 45分鐘後熄火蓋上蓋焗15分鐘 , 再反轉另一面再焗15分鐘
 

期間將青蘿蔔 , 紅蘿蔔去皮 , 粟米去外皮及粟米鬚 , 青蘿蔔 , 紅蘿蔔切件 , 粟米切段 , 蜜棗 , 南北杏用水沖一沖洗及瀝乾

焗好的豬手盛起抹乾水份(煲豬手的水留起) , 用叉狂插豬皮再抹乾 , 反轉另一面同樣用叉狂插豬皮再抹乾靜待20分鐘 , 煲豬手的水隔去白胡椒粒及香葉 , 粟米放入煲內 , 加入蜜棗及南北杏 , 再加入煲豬手的水拌勻 , 煲至微滾後加入青蘿蔔及白蘿蔔拌勻 , 用中火煲15分鐘 , 蓋上蓋轉慢火煲1小時

豬手放入兩個食物袋內 , 倒入麥啤及灑上黑胡椒碎 , 打結先浸啤酒浴30分鐘 , 再將豬手反轉另一面 , 同樣灑上黑胡椒碎 , 再浸30分鐘 , 焗盤放上錫紙 , 再放上網架 , 浸好啤酒浴的豬手放在網架上再靜待10分鐘 , 浸豬手的麥啤留起 , 煲好的青紅蘿蔔湯熄火焗30分鐘

焗爐用200C預熱10分鐘 , 豬手放入焗爐用200C上下火焗50分鐘 , 焗15分鐘後將豬手取出 , 掃上一層浸豬手留起的麥啤 , 再反轉另一面掃上麥啤 , 放入焗爐繼續焗

再焗15分鐘後 , 再將豬手取出掃上一層麥啤 , 再反轉另一面掃上麥啤後 , 再入焗爐繼續焗 , 焗好晒50分鐘後 , 將豬手取出掃上蜜糖 , 放入焗爐轉用上火調至220C焗5分鐘 , 5分鐘後取出豬手反轉另一面 , 掃上蜜糖水 , 再入焗爐繼續用220C上火焗5分鐘至金黃 , 取出待涼10分鐘 , 青紅蘿蔔湯再用中火煲滾即可

材料
急凍豬手1隻 , 白胡椒粒 , 香葉5-6片 , 黑胡椒碎 , 青蘿蔔1條 , 紅蘿蔔1條 , 白醋1/2茶匙 , 粟米1條 , 蜜糖 , 麥啤1罐 , 錫紙 , 掃 , 叉 , 蜜棗3粒 , 南北杏 , 膠袋2個



做法
1. 豬手解凍沖洗乾淨 , 抹乾水份放入煲內 , 加入白胡椒粒 , 香葉及白醋

2. 加適量水(水的份量蓋過豬手即可) 

3. 用中火煲至滾後 , 繼續用中火煲45分鐘
   (期間不需要蓋上煲蓋 , 煲約一半時間左右將豬手反轉另一面繼續煲)

4. 45分鐘後熄火蓋上蓋焗15分鐘 , 再反轉另一面再焗15分鐘

5. 期間將青蘿蔔 , 紅蘿蔔去皮 , 粟米去外皮及粟米鬚 

6. 青蘿蔔 , 紅蘿蔔切件 , 粟米切段 , 蜜棗 , 南北杏用水沖一沖洗及瀝乾

7. 焗好的豬手盛起抹乾水份(煲豬手的水留起) 

8. 用叉狂插豬皮再抹乾 , 反轉另一面同樣用叉狂插豬皮再抹乾靜待20分鐘 

9. 煲豬手的水隔去白胡椒粒及香葉 

10. 粟米放入煲內 , 加入蜜棗及南北杏 , 再加入煲豬手的水拌勻 

11. 煲至微滾後加入青蘿蔔及白蘿蔔拌勻 , 用中火煲15分鐘 , 蓋上蓋轉慢火煲1小時

12. 豬手放入兩個食物袋內 , 倒入麥啤及灑上黑胡椒碎 , 打結先浸啤酒浴30分鐘 

13. 再將豬手反轉另一面 , 同樣灑上黑胡椒碎 , 再浸30分鐘 

14. 焗盤放上錫紙 , 再放上網架 

15. 浸好啤酒浴的豬手放在網架上再靜待10分鐘 , 浸豬手的麥啤留起 

16. 煲好的青紅蘿蔔湯熄火焗30分鐘

17. 焗爐用200C預熱10分鐘 

18. 豬手放入焗爐用200C上下火焗50分鐘

19. 焗15分鐘後將豬手取出 , 掃上一層浸豬手留起的麥啤 , 再反轉另一面掃上麥啤

20. 放入焗爐繼續焗

21. 再焗15分鐘後 , 再將豬手取出掃上一層麥啤 , 再反轉另一面掃上麥啤後 

22. 再入焗爐繼續焗 

23. 焗好晒50分鐘後 , 將豬手取出掃上蜜糖 , 放入焗爐轉用上火調至220C焗5分鐘 

24. 5分鐘後取出豬手反轉另一面 , 掃上蜜糖水 

25. 再入焗爐繼續用220C上火焗5分鐘至金黃 , 取出待涼10分鐘 

26. 青紅蘿蔔湯再用中火煲滾即可 




有黑胡椒碎 , 有蜜糖 , 有麥啤的香味 , 仲有青紅蘿蔔湯 , 雖然長時間製作 , 但味道超正 , 付出多多時間製作都值得呢 ^^