<美的破壁機BL1188食譜> 自製魚丸 / 魚蛋

上次美的破壁機開封後就整左美味的腰果露 , 今次就整魚丸 , 其實袁太點解會整魚丸 ??? 一般的情況下 , 想食魚球或魚丸/魚蛋 , 都會去魚店買鯪魚肉 , 或去豆腐店/急凍店買現成魚蛋 , 回家煮一煮就得 ......



咁袁太為何要自己整魚丸呢 ??? 主因咪又係多得袁生囉 , 話說某朝袁太落街去買餸 , 袁生就叫袁太買條鯇魚回家蒸一蒸做晚餐 , 點知到接近三點的時候 , 袁生突然話晚餐都係唔想食飯 , 想食麵 , 咁條鯇魚點算好呢 ??? 所以袁太就想起不如用來整魚丸 , 可以拌麵之餘 , 又唔駛浪費左條鯇魚



講開魚丸 , 袁生袁太都係喜愛吃魚蛋的人 , 無論小食店一串串的 , 還是雲吞麵店的魚蛋我地都愛 , N年前袁太其實整過一次 , 係用鮫魚整 , 不過呢期鮫魚都幾貴 , 而且今次目的係想清走條鯇魚 , 而且用鯇魚絕對經濟好多 , 袁太會用破壁機幫手打爛魚肉 , 再加入薑汁 , 胡椒粉拌勻就可以去腥味 , 再加生粉一同拌勻撻下佢 , 放入水中煮熟再浸冰水 , 就可以令魚蛋更彈牙 , 整好的魚丸用來拌麵 , 或沾粉油鑊成炸魚蛋都一樣~yummy yummy~呢 ^^



材料 : 鯇魚 , 蔥 , 薑 , 冰粒 , 鹽 , 胡椒粉 , 美的破壁機(BL1188) 

鯇魚去皮 , 用水沖洗乾淨及抹乾水份後切粒 , 薑蘑成薑汁 , 蔥切粒 , 將鯇魚肉粒放入美的破壁機內 , 加入冰粒 , 按1速打約30秒成魚漿 , 起出放入碟內蓋上保鮮紙入冰箱冷藏1小時

冷藏1小時的魚漿從冰箱取出放入大碗內 , 逐一加少許鹽 , 薑汁 , 胡椒粉 , 生粉拌勻 , 用手撻廿餘下至起膠 , 用手唧出魚球 , 再用羹取出放上碟 , 餘下一半份量魚漿加入蔥粒拌勻 , 同樣用手唧出魚球 , 煲內燒滾水 , 放入魚蛋用中火煮至滾起浮面熟透後取出 , 放入大碗內浸冰水片刻即可

材料
鯇魚 , 蔥 , 薑 , 冰粒 , 鹽 , 胡椒粉 , 美的破壁機(BL1188)   



做法
1. 鯇魚去皮 , 用水沖洗乾淨及抹乾水份後切粒 , 薑蘑成薑汁 , 蔥切粒 

2. 將鯇魚肉粒放入美的破壁機內 , 加入冰粒 , 按1速打約30秒成魚漿 

3. 起出放入碟內蓋上保鮮紙入冰箱冷藏1小時

4. 冷藏1小時的魚漿從冰箱取出放入大碗內 

5. 逐一加少許鹽 , 薑汁 , 胡椒粉 , 生粉拌勻 , 用手撻廿餘下至起膠 

6. 用手唧出魚球 , 再用羹取出放上碟 , 餘下一半份量魚漿加入蔥粒拌勻 

7. 同樣用手唧出魚球 

8. 煲內燒滾水 , 放入魚蛋用中火煮至滾起浮面熟透後取出 

9. 放入大碗內浸冰水片刻即可




自家製的魚丸/魚蛋都可以好彈牙 , 雖然賣相唔太靚 , 但味道絕對讚讚 , 拌麵或油炸都一樣掂呢 ^^