<美的智能高速鍋MY-SS5033食譜> 菜膽冬菇雲吞雞

又係美的智能高速鍋食譜 , 袁生某日突然好想食雲吞雞 , 雲吞雞我同袁生都鐘意食 , 以前有時會去下酒樓或者快餐店食 , 不過料就少少 , 湯就多多 , 而且湯的味道飲得出只係用雞湯煮 , 好鬼重味精 , 如果在家自製 , 我會鐘意加冬菇同紅棗 , 再用原隻雞去煮個雞湯 , 味道一定夠濃郁 ......



何況現在還是唔食得雞 , 所以只煮俾袁生食 , 屋企附近街市的冰鮮雞 , 38蚊/1隻 , 唔太大隻 , 而且之前買過幾次回家煮都覺得唔錯 , 袁生話肉質唔鞋 , 所以又去encore買呢款雞

起初想自己包雲吞 , 唔係 , 應該係話想叫袁生幫我包雲吞 , 因為我只係曉包水餃 , 雲吞我完全唔曉包 , 次次都係麻煩袁生既 , 只不過袁生呢幾日好鬼忙 , 完全唔得閒應酬我 , 所以去左雲吞麵店買半打現成雲吞 , 如果用普通煲煮雲吞雞都要用上幾粒鐘時間 , 不過有美的智能高速鍋幫手就好快攪掂 , 因用全隻雞煮湯 , 所以味道好濃郁 , 而且加左無糖豆漿同煮 , 只係加少少鹽 , 胡椒粉調味就食得 , 袁生食時話唔夠菜食 , 見雪櫃仲有娃娃菜 , 就加埋入湯內 , 再煮個白飯做成雲吞雞湯飯俾袁生做晚餐 , ~頂~ 見佢食得好鬼滿足 , 見到都流晒口水呢 ^^

材料 : 雞 , 冬菇(預先浸軟) , 浸冬菇水 , 紅棗 , 無糖豆漿 , 小棠菜 , 雲吞 , 鹽 , 酒 , 胡椒粉 , 薑 , 美的智能高速鍋(MY-SS5033)

將雞去頭去尾 , 雞腳剪開 , 刮去雞內污物 , 用水沖洗外內再抹乾水份 , 連同雞腳放入器皿內加少許鹽及酒拌勻 , 蓋上保鮮紙靜待1小時

小棠菜加少許鹽浸過面10分鐘 , 紅棗去核 , 薑去皮切絲 , 小棠菜用水沖洗乾淨切半 , 1小時後將雞放入熱水中用中火煮至兩面轉色

  

將雞盛起放入美的智能高速鍋的煲內 , 逐一加入薑絲 , 紅棗 , 冬菇 , 冬菇水及適量水拌勻 , 蓋上蓋先按<菜單> , 選擇煲湯功能 , 再按<烹飪模式> , 選擇標準模式 , 再按<開始> , 之後會有時間顯示需時多久

期間將雲吞放入水中煮至熟透 , 高速鍋煮完後會發出嗶嗶聲響 , 此時安全眼會凸出 , 用手向右排氣 , 當安全眼落下代表排氣完成 , 便可打開鍋蓋 , 將湯面的雞油盛起去掉 , 逐一加入小棠菜 , 雲吞 , 少許鹽 , 胡椒粉調味 , 最後加入無糖豆漿拌勻即可

材料 
雞1隻 , 冬菇6隻(預先浸軟) , 浸冬菇水 , 紅棗6粒 , 無糖豆漿200ml , 小棠菜1/2斤 , 雲吞6粒 , 鹽 , 酒 , 胡椒粉 , 薑 , 美的智能高速鍋(MY-SS5033)



做法
1. 將雞去頭去尾 , 雞腳剪開 , 刮去雞內污物 , 用水沖洗外內再抹乾水份 

2. 連同雞腳放入器皿內加少許鹽及酒拌勻 , 蓋上保鮮紙靜待1小時

3. 小棠菜加少許鹽浸過面10分鐘 

4. 紅棗去核 , 薑去皮切絲 , 小棠菜用水沖洗乾淨切半 

5. 1小時後將雞放入熱水中用中火煮至兩面轉色

6. 將雞盛起放入美的智能高速鍋的煲內 , 逐一加入薑絲 , 紅棗 , 冬菇 , 冬菇水及適量水拌勻 

7. 蓋上蓋先按<菜單> , 選擇煲湯功能 

8. 再按<烹飪模式> , 選擇標準模式 , 再按<開始> , 之後會有時間顯示需時多久 

9. 期間將雲吞放入水中煮至熟透 

10. 高速鍋煮完後會發出嗶嗶聲響 

11. 此時安全眼會凸出 , 用手向右排氣 , 當安全眼落下代表排氣完成 , 便可打開鍋蓋 

12. 將湯面的雞油盛起去掉 

13. 逐一加入小棠菜 , 雲吞 , 少許鹽 , 胡椒粉調味 , 最後加入無糖豆漿拌勻即可 




超足料的菜膽冬菇雲吞雞 , 加個烏冬或者白飯拌湯食一流呢 ^^