2018年10月10日 星期三

[惹味湯 / 火鍋湯底] 泰式冬蔭功湯




袁生某日突然想飲冬蔭功湯 , 但袁太一向唔多喜愛酸酸辣辣的湯 , 不過大家知喇 , 袁生一開口 , 袁太就算幾唔鐘意食 , 幾唔鐘意飲 , 我都會去買材料煮俾佢食 , 做女人做到的咁都算犯賤呢 , 哈 ... 


其實在家自製冬蔭功湯好容易 , 除左基本的材料~蕃茄 , 草菇 , 蝦~外 , 最重要係冬蔭功醬同冬蔭功香料包(包括香茅 , 南薑 , 乾蔥頭 , 青辣椒 , 紅辣椒 , 青檸 , 檸檬葉) , 冬蔭功醬係東南亞店賣 , 香料包係超市賣的





今次袁太又用上高速鍋幫手 , 雖然用明火煲都唔需要好多時間 , 但用高速鍋夠方便 , 皆因煲湯當日袁太要去醫院覆診 , 由佢煲再焗下佢 , 袁生可以自己攞黎飲 , 快靚正 , 袁生話用高速鍋煲濃味得多 , 俾用明火更加香 , 更加好味 



其實冬蔭功湯做火鍋湯底都唔錯架 , 當天氣寒冷的時候 , 又係火鍋出場的時候 , 雖然現今社會裡面 , 好多人都覺得出外打邊爐好過係屋企打 , 當然呢 , 唔駛煮湯底又唔駛買材料 , 又唔駛洗碗碟 ,  ~哈~ 所以袁太以前都愛出面打爐 , 不過在家食火鍋其實都唔錯 , 可以慢慢食 , 慢慢傾 , 最重要係環境清靜 , 打三 , 四粒鐘完全冇問題 , 而且在家打邊爐 , 湯底可以隨自己喜愛選擇 , 袁太極力推介 , 大家如在家打爐 , 可以考慮呢個湯做火鍋湯底 , 袁太都講過 , 本身唔太愛呢款湯 , 可以話完全唔飲 , 唔喜愛佢辣辣地又酸酸地的感覺 , 不過用來做火鍋底我又唔會抗拒 , 皆因自己煮湯可控制味道 , 袁太就比較喜愛用多些蕃茄 , 令湯味道甜些少 , 稍為可以減少香料的味道 , 袁生就係喜愛袁太呢種味道呢 ^^



材料 : 蕃茄 , 基圍蝦 , 冬蔭功醬 , 香茅 , 檸檬葉 , 南薑 , 紅辣椒 , 青辣椒 , 乾蔥頭 , 青檸 , 草菇 , 芫茜 , 魚露 




基圍蝦去頭去殼留用 , 用水沖一沖洗及瀝乾 , 草菇及蕃茄用水沖洗乾淨 , 草菇切片 , 蕃茄切件 , 檸檬葉撕碎 , 南薑切片 , 香茅拍一拍切片 , 辣椒洗淨 , 乾蔥頭去衣切片, 芫茜切碎 , 青檸切半











煲內加入少許油燒熱 , 先爆香蝦殼至轉色後盛起去掉 , 再放入蝦頭爆香至轉色及有香味 , 逐一加入蕃茄 , 草菇片及冬陰功醬拌勻炒數分鐘 













將材料放入美的智能高速鍋的煲內 , 加入適量熱水 , 逐一放入香茅片 , 南薑片 , 乾蔥片 , 芫茜莖及青 , 紅辣椒拌勻 , 蓋上蓋先按<菜單> , 選擇煲湯功能 , 再按<烹飪模式> , 選擇標準模式 , 再按<開始> , 之後會有時間顯示需時多久
















高速鍋煮完後會發出嗶嗶聲響 , 此時安全眼會凸出 , 用手向右排氣 , 當安全眼落下代表排氣完成 , 便可打開鍋蓋 , 將蝦肉加入湯中 , 再加少許魚露 , 幾塊檸檬葉及半個青檸汁拌勻至蝦肉熟透即可
















 
材料
蕃茄3個 , 基圍蝦1/2斤 , 冬蔭功醬1包 , 香茅2條 , 檸檬葉 , 南薑 , 紅辣椒3條 , 青辣椒3條 , 乾蔥頭2粒 , 青檸1個 , 草菇 , 芫茜 , 魚露



做法
1. 基圍蝦去頭去殼留用 , 用水沖一沖洗及瀝乾 

2. 草菇及蕃茄用水沖洗乾淨 , 草菇切片 , 蕃茄切件 

3. 檸檬葉撕碎 , 南薑切片 , 香茅拍一拍切片 , 紅 , 青辣椒洗淨 , 乾蔥頭去衣切片, 芫茜切碎 , 青檸切半 

4. 煲內加入少許油燒熱 , 先爆香蝦殼至轉色後盛起去掉 

5. 再放入蝦頭爆香至轉色及有香味 

6. 逐一加入蕃茄 , 草菇片及冬陰功醬拌勻炒數分鐘  

7. 將材料放入美的智能高速鍋的煲內 

8. 加入適量熱水 , 逐一放入香茅片 , 南薑片 , 乾蔥片 , 芫茜莖及青 , 紅辣椒拌勻 

9. 蓋上蓋先按<菜單> , 選擇煲湯功能

10. 再按<烹飪模式> , 選擇標準模式 , 再按<開始> , 之後會有時間顯示需時多久

11. 高速鍋煮完後會發出嗶嗶聲響

12. 此時安全眼會凸出 , 用手向右排氣 , 當安全眼落下代表排氣完成 , 便可打開鍋蓋 

13. 將蝦肉加入湯中 , 再加少許魚露 , 幾塊檸檬葉及半個青檸汁拌勻至蝦肉熟透即可 



(如用明火煲 , 做晒步驟一至六後 , 加入適量熱水 , 放入香茅片 , 南薑片 , 乾蔥片 , 芫茜莖及青 , 紅辣椒拌勻 , 蓋上蓋用中火煲20分鐘 , 再加入蝦肉蓋上蓋轉慢火煲15分鐘至蝦肉熟透 , 最後加少許魚露 , 檸檬葉及青檸汁拌勻即可)




冬蔭功無論當湯飲或用來做火鍋湯底 , 都同樣美味 , 仲有蝦同草菇食添 , 好滿足呢 ^^







15 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......