[點心.點心] 山竹牛肉球

之前有文章提及過袁生最情有獨鐘的點心有豉椒鳳爪 , 其實情有獨鐘既唔止一樣 , 仲有山竹牛肉球 , 前排袁生同我講想食山竹牛肉做早點 , 又話出面點心店唔好食 , 咁我就邀請袁生不如一齊去酒樓飲茶咪有得食囉 , 佢又唔肯 , 之後個幾日佢好似細路仔咁不停係我耳邊轟炸 , 袁太終於敗給他 , 就買材料整牛肉球俾佢做早點 ......



印象中N年前整過一次 , 不過個次印象好難忘 , 因為個次山竹牛肉的製成品係絕對超級難食 , 大家唔好成日覺得袁太整的食物好吸引 , 好似好好味咁 , 其實有時某幾樣野我都要整好幾次才成功 , 呢個牛肉球就係一個好例子 , 今次呢個食譜係我上網search既 , 加入蘇打粉同鹼水拌勻 , 再撻下牛肉又雪下佢 , 呢幾個步驟都幾重要 , 袁太之前整既就係冇落蘇打粉同鹼水 , 而且撻都冇撻就攞去蒸 , 所以味道就 ... 完全唔掂 , 今次相反 , 味道超成功



蒸好放上枱 , 袁生就拿拿臨消滅晒 , 評語係好味過酒樓 , 還讚袁太將馬蹄切到咁碎 , 佢好滿意 , 袁生俾完100分再100分 , 不過轉頭又話墊底既腐皮就硬左少少 , 腐皮硬就話之佢喇 , 最重要個牛肉球成功就可以呢 ^^

材料 : 免治牛肉 , 馬蹄 , 果皮(預先浸軟) , 薑 , 肥豬肉 , 芫茜 , 鹽 , 蘇打粉 , 腐皮 , 胡椒粉 , 鹼水 , 喼汁 , 水 , 美的早餐機(MZ-DSY18A)

牛肉放入大碗內 , 加入蘇打粉 , 鹽 , 生粉先拌勻靜待10分鐘 , 期間將浸軟果皮刮去囊切碎 , 馬蹄去皮切碎 , 肥豬肉剁碎 , 薑去皮蘑成薑汁蓉 , 芫茜切碎

10分鐘後加入薑汁蓉 , 果皮碎及水拌勻 , 用手撻十餘下 , 蓋上保鮮紙放入雪櫃靜待一晚 , 翌日將牛肉從雪櫃取出 , 逐一加入肥豬肉 , 芫茜碎 , 馬蹄碎及少許水拌勻 , 再加入鹼水 , 生油及生抽拌勻 , 再一次用手撻十餘下至起膠靜待30分鐘

腐皮切細片 , 加水浸過面靜待10分鐘至軟身 , 盛起放入碗或碟內 , 牛肉用手唧成球狀放在腐皮上 , 放入早餐機的蒸架上 , 蓋上蓋按<蒸 / 煮>功能 , 時間調至12分鐘 , 取出淋上少許喼汁即可

材料 
免治牛肉200g , 馬蹄4粒 , 果皮2塊(預先浸軟) , 薑 , 肥豬肉 , 芫茜 , 鹽 , 蘇打粉1茶匙 , 腐皮1塊 , 胡椒粉 , 鹼水1湯匙 , 喼汁 , 水 , 美的早餐機(MZ-DSY18A)

做法

1. 牛肉放入大碗內 , 加入蘇打粉 , 鹽 , 生粉先拌勻靜待10分鐘 

2. 期間將浸軟果皮刮去囊切碎 , 馬蹄去皮切碎 , 肥豬肉剁碎 , 薑去皮蘑成薑汁蓉 , 芫茜切碎

3. 10分鐘後加入薑汁蓉 , 果皮碎及水拌勻 , 用手撻十餘下 

4. 蓋上保鮮紙放入雪櫃靜待一晚 

5. 翌日將牛肉從雪櫃取出 , 逐一加入肥豬肉 , 芫茜碎 , 馬蹄碎及少許水拌勻

6. 再加入鹼水 , 生油及生抽拌勻 

7. 再一次用手撻十餘下至起膠靜待30分鐘

8. 腐皮切細片 , 加水浸過面靜待10分鐘至軟身 

9. 盛起放入碗或碟內 

10. 牛肉用手唧成球狀放在腐皮上 

11. 放入早餐機的蒸架上 , 蓋上蓋按<蒸 / 煮>功能 , 時間調至12分鐘 

12. 取出淋上少許喼汁即可




超成功超美味的山竹牛肉球 , 唔駛5分鐘已經俾袁生清晒呢 ^^