2019年3月31日 星期日

梅菜白蘿蔔炆豬腩肉




每次去街市都必然會經過豬肉檔 , 雙眼會好自然望下今日的腩肉靚唔靚仔 , 靚的話又會忍唔住手 , 點知今次的腩肉都算靚仔 , 所以又買了條回家 , 本應想用來配粉葛煲湯 , 不過突然又想用來炆 ......



炆腩肉我最愛用梅菜 , 鹹鹹的絕對好拌飯 , 起初記得百寶箱好似還有豆乾剩下 , 所以好老定只買了梅菜同腩肉 , 後來回家才發現 ...  豆乾失蹤了 , 當將雪櫃的剩餘物資差不多全部拎晒出來的時候 , 先記起原來上次包春卷的時候用埋 , ~哈~ 袁太的記性真係越來越衰退



不過又好彩地俾我係百寶箱找到條白蘿蔔 , 應該買來想整蘿蔔糕呢 , 大家冇睇錯 , 係蘿蔔糕呀 , 唔知點解呢幾日突然想食蘿蔔糕 , 不過買左又未整 , 咁就偷步用來炆腩肉先 , 今次又係一早炆定 , 食前再番熱 , 味道濃郁 , 腩肉吸收汁料的味道 , 梅菜連汁又好送飯 , 我都忍唔到口食左兩碗飯 , 另外加左碟清炒菜心就可以開餐呢 ^^



材料 : 豬腩肉 , 白蘿蔔 , 梅菜 , 蒜頭 , 乾蔥頭 , 酒 , 糖 , 冰糖 , 胡椒粉 , 蔥 , 水 , 美的早餐機(MZ-DSY18A)




豬腩肉放入煲內 , 加水蓋過面用中火煮滾後用水沖一沖洗 , 將腩肉切件 , 蒜頭去衣切粒 , 乾蔥頭去衣切片 , 蔥切段及切絲









燒紅鑊 , 將豬腩肉放入鑊中用中火煎至兩面微黃色 , 將腩肉推埋一邊 , 再加入蒜粒 , 乾蔥片及酒拌勻炒香 , 加入調味料 , 冰糖及5杯水拌勻 , 用中火煮滾後蓋上蓋轉慢火炆45分鐘 
















期間將梅菜去頭放入煲內 , 加水浸過面靜待30分鐘 , 浸好的梅菜用水再沖一沖洗乾淨 , 瀝乾水份後用手渣乾再切粒 , 放入美的早餐機的煎pan內 , 按<煎餅>功能 , 加少許麻油及黃糖炒數分鐘至有香味 , 盛起梅菜備用 , 白蘿蔔去皮切件














45分鐘後將梅菜加入拌勻蓋上蓋繼續用慢火炆30分鐘 , 30分鐘後加入白蘿蔔及1杯水份量拌勻 , 再蓋上蓋用慢火炆15分鐘 , 最後加入蔥段拌勻即可






















材料 
豬腩肉1條 , 白蘿蔔1條 , 梅菜2棵 , 蒜頭1/2個 , 乾蔥頭3粒 , 酒 , 糖 , 冰糖 , 胡椒粉 , 蔥 , 水5杯 , 美的早餐機(MZ-DSY18A)

調味料 
生抽 , 老抽 
 


做法
1. 豬腩肉放入煲內 , 加水蓋過面用中火煮滾後用水沖一沖洗 , 將腩肉切件 

2. 蒜頭去衣切粒 , 乾蔥頭去衣切片 , 蔥切段及切絲

3. 燒紅鑊 , 將豬腩肉放入鑊中用中火煎至兩面微黃色

4. 將腩肉推埋一邊 , 再加入蒜粒 , 乾蔥片及酒拌勻炒香

5. 加入調味料 , 冰糖及5杯水拌勻 , 用中火煮滾後蓋上蓋轉慢火炆45分鐘  

6. 期間將梅菜去頭放入煲內 , 加水浸過面靜待30分鐘 

7. 浸好的梅菜用水再沖一沖洗乾淨 , 瀝乾水份後用手渣乾再切粒 

8. 放入美的早餐機的煎pan內 , 按<煎餅>功能 , 加少許麻油及黃糖炒數分鐘至有香味 

9. 盛起梅菜備用 

10. 白蘿蔔去皮切件

11. 45分鐘後將梅菜加入拌勻蓋上蓋繼續用慢火炆30分鐘 

12. 30分鐘後加入白蘿蔔及1杯水份量拌勻 , 再蓋上蓋用慢火炆15分鐘 

13. 最後加入蔥段拌勻即可 




炆左一大煲 , 食唔晒放入雪櫃隔夜仲入味 , 翌日下午配白飯做午餐清埋佢 , 用汁撈飯絕對一流呢 ^^








14 則留言:

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......