涼拌皮蛋雞蛋豆腐

原來袁太冇update食譜已三個星期有多，最近比較忙，忙打點老爺身後事，去美的roadshow做示範，家中又進行翻新工程，又亂又多灰塵，飯都冇煮好多日，這幾天實在太熱，太陽高高掛，又悶悶焗焗 , 落一陣街都出晒汗 , 悶悶焗焗的天氣最好就食涼拌 , 點解袁太會整涼拌 , 其實係因為 ......



袁太的朋友仔閒時都會whatsapp叫我幫忙煮野 , 有時會叫袁太幫忙整蛋糕 , 麵包 , 或者派對小食 , 今次朋友仔whatsapp想整涼拌 , 我當然唔會say no , 不過朋友就冇特定要咩涼拌 , 由袁太決定 , 袁家涼拌系列都有好多種 , 有~雪菜粉皮呀~ , ~海蜇手撕雞~ , 不過我同袁生最愛的涼拌首選係豆腐 , 而豆腐又係自家製出品的雞蛋豆腐 , 自家製滑滑健康無添加



其實以往整涼拌豆腐必然會去超市買方便裝 , 不過我知袁生比較喜愛食袁太整的雞蛋豆腐 , 所以之後都以雞蛋豆腐代替 , 不過豆腐要好小心處理 , 一唔小心就會整爛晒d豆腐 , 滑溜溜兼凍冰冰的豆腐 , 淋上調味汁 , 話咁快就有得食 , 係咪好簡單呢 , 食時加入蔥粒及豬肉鬆 , 就更加美味 , 雖然市面上的盒裝豆腐都衛生及方便 , 不過始終還是自家製 , 出品的豆腐最健康 , 食得絕對好放心 , 見材料有多 , 袁太就整多份同袁生慢慢嘆 , 當晚朋友仔放工來取 , 夜晚都有whatsapp俾袁太 , 話好好味 , 佢一家都好喜歡呢 ^^



材料 : 無糖豆漿 , 雞蛋 , 皮蛋 , 蒜頭 , 蔥 , 乾蔥頭 , 鹽 , 糖 , 胡椒粉 , 豬肉鬆 , 隔篩 , 錫紙蒸盆 , 美的早餐機(MZ-DSY18A)

雞蛋打入大碗內 , 加入鹽及無糖豆漿拌勻 , 錫紙蒸盆放上一層保鮮紙 , 將豆漿蛋液用篩網隔去多餘泡沫及雜質 , 放入早餐機內蓋上蓋按<蒸 / 煮>功能 , 時間調至5分鐘 , 再用筷子將蓋留縫隙(可避免蒸出來的豆腐過老或變火山口) , 時間再調至25分鐘

雞蛋豆腐蒸好後去邊切粒 , 放入大碗內加冰水浸過面靜待10分鐘 , 已浸冰水10分鐘的雞蛋豆腐瀝乾水份先放上碟 , 蓋上保鮮紙入冰箱冷藏1小時 , 皮蛋去殼切粒 , 蒜頭 , 乾蔥頭去衣切細粒 , 蔥切粒

鑊中加入蒜粒 , 乾蔥粒爆香 , 加入調味料及水拌勻用中火煮滾 , 雞蛋豆腐及皮蛋放入碗或碟內 , 淋上汁料 , 最後灑上蔥粒及豬肉鬆即可

材料 
無糖豆漿300ml , 雞蛋3隻 , 皮蛋2隻 , 蒜頭1/2個 , 蔥 , 乾蔥頭4粒 , 鹽 , 糖 , 胡椒粉 , 豬肉鬆 , 隔篩 , 錫紙蒸盆 , 美的早餐機(MZ-DSY18A)

調味料
蠔油1湯匙 , 生抽 , 糖 , 胡椒粉



做法
1. 雞蛋打入大碗內 , 加入鹽及無糖豆漿拌勻 

2. 錫紙蒸盆放上一層保鮮紙 , 將豆漿蛋液用篩網隔去多餘泡沫及雜質 

3. 放入早餐機內蓋上蓋按<蒸 / 煮>功能 , 時間調至5分鐘 

4. 再用筷子將蓋留縫隙(可避免蒸出來的豆腐過老或變火山口)

5. 時間再調至25分鐘

6. 雞蛋豆腐蒸好後去邊切粒 , 放入大碗內加冰水浸過面靜待10分鐘 

7. 已浸冰水10分鐘的雞蛋豆腐瀝乾水份先放上碟 , 蓋上保鮮紙入冰箱冷藏1小時

8. 皮蛋去殼切粒 , 蒜頭 , 乾蔥頭去衣切細粒 , 蔥切粒

9. 鑊中加入蒜粒 , 乾蔥粒爆香 , 加入調味料及水拌勻用中火煮滾 

10. 雞蛋豆腐及皮蛋放入碗或碟內 , 淋上汁料 , 最後灑上蔥粒及豬肉鬆即可 




涼拌皮蛋雞蛋豆腐 , 無論夏天或秋涼天氣都啱食 , 今次還用上自家製雞蛋豆腐 , 滑滑健康無添加又美味 , 一份外賣裝留俾朋友仔呢 ^^