椰汁馬豆糕 / 紅豆糕

前幾日執廚房時俾袁生發現有馬豆 , 就即刻叫袁太整馬豆糕俾佢做宵夜 , 當搵下齊唔齊材料時 , 發現有罐買左好耐而又未開封的罐頭紅豆蓉 , 所以就決定除左整馬豆糕外 , 整埋紅豆糕喇 , 因袁太係唔愛吃馬豆的人 , 由細到大都唔喜歡 ......
 


唔知點解總覺得馬豆有陣怪味 , 想我食真係好難 , 以往係街經過見有得賣 , 一定會買番幾件俾袁生食 , 不過麻煩友又鬼死咁多怨言 , 又話出面買的唔夠滑 , 又話唔夠實 , 又水汪汪 , 所以佢而家每次想食馬豆糕 , 就會發洩係我度 , 要求或命令叫我整 , 我見馬豆糕做法唔難 , 所以佢每次開聲我都會整 , 不過我唔擔保會整得好味



不過自己整都有好處 , 就係可以控制甜的程度 , 街買的真係可以食到有糖尿病 , 所以我就會選擇整少甜版本 , 食咁甜對身體都唔太好 , 整馬豆糕的材料同做法其實好簡單 , 只需要馬豆 , 椰漿 , 淡奶 , 粟粉 , 糖 , 水就可以 , 只係落馬豆前盛起一半份量 , 加入紅豆蓉就變成紅豆糕呢 ,  而且今次整的份量唔算多 , 因始終唔太多人食 , 但袁生條友居然食得晒 , 睇來佢真係好愛 ... 好愛馬豆糕 , 袁生仲話袁太整的馬豆糕雖然好滑滑 , 好香椰汁味 , 不過唔夠實 , 話可能袁太落得太多豆的關係喎 , 唔理佢喇 , 仲知好味就得呢 ^^



材料 : 馬豆(預先加水浸一小時) , 紅豆蓉 , 椰漿 , 淡奶 , 粟粉 , 白砂糖 , 水 , 錫紙盆 , 美的早餐機(MZ-DSY18A)

馬豆浸1小時後用水沖一沖洗及瀝乾 , 放入美的早餐機的煲內加水蓋過馬豆面 , 蓋上蓋按<蒸 / 煮>功能 , 時間調至45分鐘 , 大約煮10分鐘至水滾後將火力調低至300繼續煮至馬豆軟身 , 煮45分鐘後焗30分鐘(或可將馬豆放入煲內加水用中火煮滾 , 再蓋上蓋轉慢火煮45分鐘 , 再熄火焗30分鐘) , 將馬豆隔水盛起備用

粟粉放入大碗內 , 加1杯水份量拌勻 , 再用隔篩去多餘粉粒 , 白砂糖放入煲內 , 加入餘下的4杯水份量拌勻 , 用中火煮至糖溶後加入淡奶及椰漿拌勻 , 再加入之前拌勻好的粟粉水 , 轉慢火拌勻慢慢煮至杰身

將約一半椰汁糊轉放入另一煲內 , 加入紅豆蓉拌勻 , 馬豆加入大煲內的椰汁糊拌勻 , 錫紙盆及各器皿用冰水沖一沖洗 , 將馬豆糊及紅豆糊逐一放入錫紙盆及各器皿內靜置30分鐘待涼 , 放入雪櫃靜待一晚或最少6小時至凝固即可

 

材料
馬豆80g(預先加水浸一小時) , 紅豆蓉1罐 , 椰漿400g(大罐) , 淡奶1罐 , 粟粉170g , 白砂糖280g , 水5杯 , 錫紙盆 , 美的早餐機(MZ-DSY18A)



做法
1. 馬豆浸1小時後用水沖一沖洗及瀝乾 

2. 放入美的早餐機的煲內加水蓋過馬豆面 , 蓋上蓋按<蒸 / 煮>功能 , 時間調至45分鐘 

3. 大約煮10分鐘至水滾後將火力調低至300繼續煮至馬豆軟身 

4. 煮45分鐘後焗30分鐘
   (或可將馬豆放入煲內加水用中火煮滾 , 再蓋上蓋轉慢火煮45分鐘 , 再熄火焗30分鐘)

5. 將馬豆隔水盛起備用

6. 粟粉放入大碗內 , 加1杯水份量拌勻 , 再用隔篩去多餘粉粒 

7. 白砂糖放入煲內 , 加入餘下的4杯水份量拌勻 

8. 用中火煮至糖溶後加入淡奶及椰漿拌勻 

9. 再加入之前拌勻好的粟粉水 , 轉慢火拌勻慢慢煮至杰身

10. 將約一半椰汁糊轉放入另一煲內 , 加入紅豆蓉拌勻 

11. 馬豆加入大煲內的椰汁糊拌勻 

12. 錫紙盆及各器皿用冰水沖一沖洗 

13. 將馬豆糊及紅豆糊逐一放入錫紙盆及各器皿內靜置30分鐘待涼

14. 放入雪櫃靜待一晚或最少6小時至凝固即可 




袁生獨家享用的滑滑椰汁馬豆糕 , 袁太真係一件都冇食過架 , 我只食紅豆糕(不過到最後只食得三件咁多 , 其他已經俾袁生食晒呢) ^^