2016年1月29日 星期五

蠔仔肉碎扒雞蛋豆腐


 


袁生昨日又突然提議想食雞蛋豆腐 , 雖然只係提議

但袁太係無選擇權的情況下無奈地SAY YES ......



不過今次整完雞蛋豆腐後又應該點煮好呢

上次就簡簡單單沾上麵包爆去炸

其實我都想再encore個炸雞蛋豆腐粒 , 奈何最近天氣太凍

已經食左好多炸物 , 辣的食物同火鍋

現在想稍為清一清下熱 , 如果唔係又會生痱滋



既然係袁生話想食雞蛋豆腐 , 咁就向佢喜愛的食材埋手

首選一定係蠔仔

不過要買靚蠔仔都唔係咁易 , 去超市碰碰運氣吧



今次蠔仔雖然冇以往咁大隻咁肥美 , 但望落都唔太差

何況用來炒肉碎都唔需要咁大隻

袁生就至愛用蠔仔炒肉碎 , 咁就簡單呢

整好雞蛋豆腐後加入麵粉煎香 , 再炒好個蠔仔肉碎後淋上豆腐面

一定好好味道呢 ^^
  

 
材料 : 蠔仔 , 豬肉碎 , 雞蛋 , 豆漿 , 鹽 , 薑 , 蔥 , 麵粉 , 保鮮紙




蠔仔放入大碗內 , 加入生粉拌勻後沖洗乾淨 , 瀝乾水份備用









豬肉碎加入醃料拌勻醃30分鐘 , 蔥切段 , 薑切幼絲 , 雞蛋打入大碗內拌勻成蛋液 , 再加入無糖豆漿及鹽拌勻










器皿放上保鮮紙 , 將豆漿蛋液用篩網隔去多餘泡沫及雜質 , 放入鑊中先用大火蒸2分鐘 , 再將鑊蓋留縫隙 , 轉慢火再蒸25分鐘









取出待涼 , 再切成件 , 蓋上保鮮紙後放入雪櫃靜待10分鐘





將之前瀝乾水份的蠔仔放入大碗內加入熱水煮30秒 , 再瀝乾水份備用







將雞蛋豆腐從雪櫃取出後每件沾上麵粉 , 放入鑊中用慢火慢慢煎至兩面金黃色 , 盛起放上廚紙上


  




 
燒紅鑊 , 爆香蔥白及薑絲後 , 加入豬肉碎炒散及轉色 , 再加入蠔仔 , 少許蠔油 , 雞粉調味輕輕拌勻至豬肉熟透











最後加入青蔥段及少許老抽拌勻 , 雞蛋豆腐放上碟後再淋上蠔仔肉碎 , 再灑上蔥粒即可











材料
蠔仔1/2斤 , 豬肉碎$10 , 雞蛋3隻 , 豆漿250ml , 鹽 , 薑 , 蔥 , 麵粉 , 保鮮紙1張

醃料
鹽 , 糖 , 生抽 , 麻油 , 生粉 



做法
1. 蠔仔放入大碗內 , 加入生粉拌勻後沖洗乾淨 , 瀝乾水份備用

2. 豬肉碎加入醃料拌勻醃30分鐘 , 蔥切段 , 薑切幼絲

3. 雞蛋打入大碗內拌勻成蛋液 , 再加入無糖豆漿及鹽拌勻

4. 器皿放上保鮮紙 , 將豆漿蛋液用篩網隔去多餘泡沫及雜質

5. 放入鑊中先用大火蒸2分鐘 , 再將鑊蓋留縫隙 , 轉慢火再蒸25分鐘

6. 取出待涼 , 再切成件 , 蓋上保鮮紙後放入雪櫃靜待10分鐘

7. 將之前瀝乾水份的蠔仔放入大碗內加入熱水煮30秒 , 再瀝乾水份備用 

8. 將雞蛋豆腐從雪櫃取出後每件沾上麵粉

9. 放入鑊中用慢火慢慢煎至兩面金黃色 , 盛起放上廚紙上 

10. 燒紅鑊 , 爆香蔥白及薑絲後 , 加入豬肉碎炒散及轉色

11. 再加入蠔仔 , 少許蠔油 , 雞粉調味輕輕拌勻至豬肉熟透 

12. 最後加入青蔥段及少許老抽拌勻

13. 雞蛋豆腐放上碟後再淋上蠔仔肉碎 , 再灑上蔥粒即可

 


蠔仔 + 肉碎 , 再配上自家製雞蛋豆腐 , 又係一道好拌飯系列呢 ^^


20 則留言:

  1. 肉碎,蠔仔,豆腐我三樣都鐘意食

    回覆刪除
  2. 蠔仔好正呀,可惜我買唔到

    回覆刪除
  3. 我這個星期又係自製雞蛋豆腐, yummy. :)

    回覆刪除
    回覆
    1. 原來妳都有整,蒸完之後就咁食還是再配其他食物呢

      刪除
  4. 袁太又自製雞蛋豆腐,滑滑口感我鐘意

    回覆刪除
  5. 我唔係太食蠔仔,但雞蛋豆腐好啱我

    回覆刪除
  6. 呢個配搭唔錯,有機會都會試下

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......