2016年5月13日 星期五

鹹魚蒸肉餅





肉餅係一道好好拌飯的家常菜 , 無論鹹魚肉餅 , 鹹蛋肉餅 , 土魷肉餅或梅菜肉餅

我同袁生都好鐘意食 , 單單一碟肉餅都可以食到兩大碗飯

不過講到肉餅 , 袁生最愛用土魷 , 而我就最愛用鹹魚 , 鹹鹹香香的味道好難抗拒 ......



以前袁太廚藝唔太好的時候 , 可以話連整肉餅都好難食

而且會貪方便買現成豬肉碎 , 蒸完出來肉又鞋又散 , 完全不好吃

後來媽咪教落蒸肉餅一定要買梅頭自行剁碎 , 仲要加水拌勻兼撻佢幾野先好味

~OK~OK~ 完全收到

自此之後 , 袁太每次想食肉餅都乖乖去街市買梅頭肉

其實剁肉都唔係太辛苦 , 都係剁15分鐘左右 , 不過每次剁完手總會感覺手得殘廢

剁完肉餅個晚隻手必然會震呢



蒸肉餅之前再灑上薑絲 , 味道都提升不少

再放上大大片鹹魚 , 加碗白飯加碗老火湯就變成一個完美的套餐

今次袁太簡單用電蒸爐去蒸肉餅 , 一來方便好多 , 二來懶得開鑊蒸

唔駛咁麻煩呢 ^^



材料 : 梅頭肉 , 鹹魚 , 薑 , 蔥 , 魚露 , 酒 , 胡椒粉 , 鹽 , 生粉 , 磨蓉器 , 芹菜葉 (裝飾可省略)




蔥切粒及切幼絲 , 一片鹹魚切粒 , 薑一半切幼絲 , 一半磨成薑汁 , 豬肉洗淨先切條再切粒 , 剁碎後加入少許鹽拌勻再剁約10分鐘至肉餅狀










將肉碎放入大碗內加入醃料拌勻靜待10分鐘 , 再加入鹹魚粒及2湯匙水拌勻撻十餘下 , 蓋上保鮮紙靜待30分鐘














將適量的肉餅材料放入碗內 , 灑上薑絲及放上原片鹹魚 , 放入電蒸爐或鑊中隔水用中火蒸15分鐘










待15分鐘肉餅熟透後取出灑上蔥粒及蔥絲即可 (可按個人喜好淋上甜豉油)








材料
梅頭肉$20 , 鹹魚2片 , 薑 , 蔥 , 魚露 , 酒 , 胡椒粉 , 鹽 , 生粉 , 磨蓉器 , 芹菜葉 (裝飾可省略)

醃料
薑汁 , 魚露 , 生抽 , 糖 , 酒 , 胡椒粉 , 麻油 , 生粉



做法
1. 蔥切粒及切幼絲 , 一片鹹魚切粒 , 薑一半切幼絲 , 一半磨成薑汁

2. 豬肉洗淨先切條再切粒

3. 剁碎後加入少許鹽拌勻再剁約10分鐘至肉餅狀

4. 將肉碎放入大碗內加入醃料拌勻靜待10分鐘

5. 再加入鹹魚粒及2湯匙水拌勻撻十餘下 , 蓋上保鮮紙靜待30分鐘

6. 將適量的肉餅材料放入碗內 , 灑上薑絲及放上原片鹹魚

7. 放入電蒸爐或鑊中隔水用中火蒸15分鐘 

8. 待15分鐘肉餅熟透後取出灑上蔥粒及蔥絲即可 (可按個人喜好淋上甜豉油) 




肉餅永遠自己剁係最好味 , 而且肉餅絕對係一道好好送飯的家常菜呢 ^^


26 則留言:

  1. 我以前都以為整肉餅好簡單, 第一次整, 散到夾唔起呀!
    而家煮多左就學會左啦!

    個蒸爐同我公司用緊既一樣呀...哈哈!
    我地用黎蒸早餐食...自己夾錢買的~

    回覆刪除
  2. 呢個好味,送飯食一流

    回覆刪除
  3. 我很久冇食咸魚,好想食呀。

    回覆刪除
    回覆
    1. 我都係好耐冇食鹹魚,所以突然間想食就去買呢

      刪除
  4. 袁太,我好耐冇食肉餅啦,好想食呀!

    回覆刪除
  5. 袁太,個肉餅好多汁咁喎,
    芙芙好少蒸肉餅,因為好怕攪豬肉攪唔好,
    蒸到出來乾爭爭,要向你偷下師先得。

    回覆刪除
  6. 一睇個肉餅就知一定好多肉汁,我食肉餅多數出街食多,老公話我整肉餅好難食,等我學下袁太呢個做法先,謝謝分享

    回覆刪除
    回覆
    1. 唔好客氣喇,妳跟呢個做法整,妳老公一定大讚架

      刪除
  7. 肉餅我最鐘意鹹蛋同鹹魚

    回覆刪除
  8. 自行剁碎豬肉整肉餅真係食落同搞碎豬肉唔同,不過真係唔好成日整,保護手部關節嘛。

    回覆刪除
  9. 自己剁豬肉來整肉餅真係好味好多,不過有時貪方便都會買現成肉碎就算

    回覆刪除
    回覆
    1. 我以前買現成肉碎都覺得味道還可以,但自從自己剁豬肉後就唔再用肉碎呢

      刪除
  10. 見到鹹魚肉餅真係流晒口水,我好耐冇食過啦

    回覆刪除
  11. 我好懶,整肉餅好多時都係買現成肉碎:P

    回覆刪除
    回覆
    1. 我以前都係買現成肉架,不過食食下覺得唔好味,之後自己剁一次肉整肉餅後就愛上了自己剁呢

      刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......