2018年6月20日 星期三

[素食版] 紅燒豆腐煲




閒時喜歡久唔久煲定一大煲素上湯 , 用黎煮下野 , 不過今次究竟煮咩好呢 ??? 其實上湯用途可以好多 , 可以用來煮水餃湯底 , 用來炒粉麵 , 或者好似袁太今次選擇用來整小菜 , 都同樣咁正 ......



今次上湯配搭的係豆腐 , 話說前幾天袁太突然好鬼想食紅燒豆腐 , 想食的程度係每分每秘都想著它 , 印象中街食的好似有冬菇 , 有豬肉絲 , 不過今次想食素食版本 , 即係冇肉類的紅燒豆腐 , 由於冇時間浸冬菇的關係 , 將冬菇轉成草菇 , 肉絲轉成雪耳 , 雪耳平時只會用來煲湯的我 , 炒或炆都好似未曾試過 , 見雪櫃仲有雪耳 , 就浸醒舊雪耳再整碎佢 , 落鑊兜埋一堆 



而豆腐方面袁太比較喜愛用包布豆腐 , 將豆腐印乾水份 , 放入油鑊內炸至金黃先再入鑊炆 , 豆腐索晒汁料的味道 , 真係好鬼死正 , 另外見百寶箱有菜心苗 , 又加埋入去 , 加下加下 , 攪到個紅燒豆腐煲好鬼多料 , 不過炆左一大煲都好快食晒呢 ^^



材料 : 布包豆腐 , 菜心苗 , 草菇 , 雪耳 , 薑 , 蒜頭 , 酒 , 蔥 , 素上湯 , 糖 , 水 , 胡椒粉




草菇用水沖洗乾淨後切片 , 蔥切段 , 薑去皮切絲 , 蒜頭去皮拍碎 , 雪耳浸水 , 浸至軟身後撕成細塊 , 用水沖一沖洗及瀝乾 , 菜心苗加少許鹽 , 加水浸過面靜待10分鐘 
 










布包豆腐切成件後印乾水份 , 放入油鑊中用中火慢慢炸 , 炸至豆腐浮面後拌一拌勻免黏底 , 慢慢炸至金黃色 , 盛起備用 , 10分鐘後將菜心苗洗淨 , 放入鑊中加少許鹽拌勻 , 蓋上蓋用慢火煮3分鐘至熟透 , 盛起放入煲內














 


鑊中爆香薑絲 , 蒜頭及一半份量蔥段 , 盛起蔥段去掉 , 加入草菇及雪耳 , 贊少許酒拌勻炒數分鐘 , 加入調味料 , 素上湯及2杯水份量拌勻 , 蓋上蓋用中火煮5分鐘



















5分鐘後加入豆腐拌勻 , 蓋上蓋轉用慢火煮10分鐘 , 加入餘下一半份量蔥段拌勻 , 最後將材料放入有菜心苗的煲內即可
















材料
布包豆腐3磚 , 菜心苗1/2斤 , 草菇 , 雪耳2個 , 薑 , 蒜頭1個 , 酒 , 蔥 , 素上湯500ml , 糖 , 水2杯 , 胡椒粉

調味料
素蠔油 , 生抽 , 糖 , 胡椒粉



做法
1. 草菇用水沖洗乾淨後切片 , 蔥切段 , 薑去皮切絲 , 蒜頭去皮拍碎 

2. 雪耳浸水 , 浸至軟身後撕成細塊 , 用水沖一沖洗及瀝乾

3. 菜心苗加少許鹽 , 加水浸過面靜待10分鐘

4. 布包豆腐切成件後印乾水份 

5. 放入油鑊中用中火慢慢炸 , 炸至豆腐浮面後拌一拌勻免黏底 

6. 慢慢炸至金黃色 , 盛起備用 

7. 10分鐘後將菜心苗洗淨 , 放入鑊中加少許鹽拌勻 , 蓋上蓋用慢火煮3分鐘至熟透 

8. 盛起放入煲內

9. 鑊中爆香薑絲 , 蒜頭及一半份量蔥段 , 盛起蔥段去掉 

10. 加入草菇及雪耳 , 贊少許酒拌勻炒數分鐘 

11. 加入調味料 , 素上湯及2杯水份量拌勻 , 蓋上蓋用中火煮5分鐘 

12. 5分鐘後加入豆腐拌勻 , 蓋上蓋轉用慢火煮10分鐘 

13. 加入餘下一半份量蔥段拌勻 , 最後將材料放入有菜心苗的煲內即可 




冇肉類的素食版紅燒豆腐都可以好吸引 , 而且仲好好拌飯呢 ^^ 









20 則留言:

  1. d豆腐炸得好靚!呢個啱晒我無冬菇!

    回覆刪除
  2. 冇肉仲好呀,食豆腐都夠

    回覆刪除
  3. 袁太真係煮咩都好足料

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......