花雕蛋白蒸海蝦

繼有次整左個花雕雞扒

獲得袁生大讚之後

袁太先發覺原來袁生係好鍾意花雕煮的菜色

所以今次再用花雕煮餸

花雕蒸蛋白相信有好多人都聽過

而袁太亦不例外,但就一次都未整過

一般都會加蟹一齊蒸

但袁太又唔想用蟹喎,咁點算呢???

所以又係開冰箱睇下有冇材料既時候喇

居然俾我見到有包急凍海蝦

用海蝦代替蟹,應該都ok掛

再加幾條蘆筍放係面~靚晒~

鍾意花雕味的袁生果然好鍾意

但我就反而覺得酒味重左少少,不過味道都唔錯!

~花雕蛋白蒸海蝦~

材料:急凍海蝦-6隻/雞蛋白-4隻/上湯-500ml/花雕酒-2湯匙

調味料:鹽,糖-少許

做法:

<1>
將雞蛋白,上湯,花雕酒及調味料拌勻後,放入碟中蓋上保鮮紙,用慢火隔水蒸5分鐘.

<2>
海蝦洗淨,沿背部切開,蘆筍洗淨斜切備用.

<3>
燒紅鑊,將蘆筍加少鹽,雞粉炒至熟透後盛起.

<4>
將海蝦平放於做法<1>的半凝固的蛋漿上,再蒸約7分鐘.

<5>
待蛋漿蒸好後,將蘆筍放在海蝦上作裝飾即可.

蒜蓉煙肉蒸白茄子

平時都知道茄子係一種有營養的食材

但就好少會煮

因為以前煮餐茄子都俾袁生話

話煮得唔夠軟身,唔好味喎

點知公司之前自家種的白茄子有收成喇

一於攞幾個番去煮下先

袁太於是上網search下白茄子有咩營養先

原來白茄子有保護心臟同血管作用

咁啱晒喇,袁太一向心臟都唔太好

最近仲痛得密左添

所以整下茄子黎食就最好不過

不過驚袁生又話硬

所以用蒸的方法去煮

開飯的時候都驚袁生唔鍾意

但好彩袁生話咁樣整好好味喎

今次個茄子做法又過到袁生呢關喇!

~蒜蓉煙肉蒸白茄子~

材料:白茄子-4條/煙肉-3片/蒜頭-適量/蔥(切粒)-適量

做法:

<1>

白茄子洗淨切件再切半放於碟中備用.

<2>
蒜蓉剁碎,煙肉切粒.

<3>
燒紅鑊(不落油)爆香煙肉盛起,落少許油爆香蒜蓉,加入少許生抽,糖調味.

<4>
將做法<3>蒸蓉汁料放在白茄子上,再灑上煙肉粒.

<5>
用大火隔水蒸8分鐘後,灑上少許蔥粒即可.

茄子含有豐富維生素P

維生素P能增強人體細胞間的粘著力,能降低膽固醇,可保持微血管的堅韌性

茄子保健功能主要有
<1>保護心血管,抗壞血病
<2>降低膽固醇
<3>抗腫瘤作用
<4>抗細菌作用
<5>抗衰老作用
<6>增加消化作用

六寶冬瓜盅

今日天氣真係有d熱

平時唔多出汗既我出去做野都成身汗

攪到夜晚餐飯都唔知煮咩好

當下午番到公司又冇咩做,老細又唔係度

就走左去附近的九龍城街市睇下有咩賣

點知俾我見到有細細個的冬瓜

最啱就係用黎整冬瓜盅

咿...今日咁熱整冬瓜盅都好喎

可以消下暑

而冬瓜盅的材料就交俾袁生放工幫我買喇

但為何會叫六寶???

咪因為用六種材料整囉

不過因為要整冬瓜盅

攪到今晚成9點幾先有飯開

本來袁生有怨言咁夜先食飯

但食左個冬瓜盅後就下左火喇

仲話好好味添!

~六寶冬瓜盅~

材料:冬瓜-半個/冬菇-4隻/豬肉碎-適量/勝瓜-半條/燒鴨-適量/蝦仁-8隻/金華火腿-1片/清雞湯-1盒

做法:

<1>

金華火腿浸水1小時,冬菇浸軟切粒,勝瓜去皮,蝦仁一同切粒,燒鴨去骨後切粒備用.

<2>
將冬瓜的底部切去一塊,使冬瓜可以站立,然後將瓜襄去掉(小心不可刮穿冬瓜).

<3>
用小刀將冬瓜頂部斜切成花紋.

<4>
燒滾水,將冬瓜盅放入煲中,冬瓜盅內加入清雞湯,冬菇粒,金華火腿片用大火燉15分鐘.

<5>
再加入勝瓜粒,豬肉碎,燒鴨肉轉慢火燉30分鐘,再加入蝦仁粒燉15分鐘,加少許鹽,胡椒粉調味即可.

XO醬海鮮蒸豆腐

突然發現雪櫃有盒蒸煮豆腐

咁唔駛煩晚餐一於蒸豆腐喇

但袁生一向唔太鍾意食豆腐

因為佢一向只喜愛濃味餸菜

咁冇理由等盒豆腐過期架

但點整袁生先會啱食呢

唯一辦法就係向袁生鍾意食既野埋手

袁生最鍾意食梗係海鮮喇

所以又係大大粒帶子出動的時候

再加上鮮蝦仁同埋惹味的XO醬

袁生讚不絕口,大讚好好味!

~XO醬海鮮蒸豆腐~

材料:蒸煮滑豆腐-1盒/日本帶子-8粒/鮮蝦仁-8隻/蔥(切粒)-適量/XO醬-2茶匙/蒜頭-適量/紹酒-少許

醃料:鹽,麻油,胡椒粉-少許

調味料:蠔油,糖,生粉,生抽,水-適量

做法:

<1>

帶子,鮮蝦仁解凍後切粒,加入醃料醃30分鐘,蒜蓉剁碎備用.

<2>
豆腐切開6件放上碟灑少許鹽,用大火隔水蒸5分鐘後倒去多餘水份備用.

<3>
燒紅鑊,爆香蒜蓉後加入帶子粒,蝦仁粒炒至半熟,贊少許紹酒,XO醬兜勻,待熟透後放在豆腐面上.

<4>
將調味料煮滾,淋在海鮮豆腐上,灑上少許蔥粒即可.