蠔油魚滑炆鮑魚仔

究竟煮咩餸好呢
去街市行下睇下有咩餸買,
去到魚檔見到有鮑魚仔賣,
不過一份都要$40,
得個7隻,好貴喔!
不過一心諗住袁生鐘意食,
冇辦法喇!
照買,俾錢個時真係有少少肉赤,
但買左番黎又點整好呢
蒸?炒?煮?炸?炆?
諗左一陣決定用炆的方法去整,
然後再買少少鯪魚肉,
番去用蠔油炆下就得喇!



~蠔油魚滑炆鮑魚仔~食譜

材料 : 鮑魚仔-7隻 / 鯪魚肉-$8 / 生菜-1棵

                     
醃料 : 生抽 , 糖 , 生粉 , 麻油 , 胡椒粉 , 水 - 少許
 

 

1.鮑魚仔洗淨,備用.
 
2.鯪魚肉加入醃料醃約30分鐘.
 
3.煲內放入適量的蠔油,鮑汁,水煮至滾後,放入鮑魚仔用慢火炆約10分鐘.
 
4.再用匙羹將鯪魚肉一粒一粒放入煲內煮約5分鐘.
 
5.將鮑魚仔,鯪魚肉撈起,放入生菜墊底,再將鮑魚仔,鯪魚肉放在生菜上.
6.再用慢火略煲一陣後,即可.

猴頭菇花旗蔘瘦肉雞湯

聽人講如果食煙多飲花旗蔘湯會幾好喎,所以...

平時袁生食煙多就係人都知
其實要叫一個食煙的人戎煙係咪一件好難既事黎呢?
袁太已經同袁生講過
叫佢唔好食咁多煙,我知有時工作壓力大以食煙係好正常
但都可以盡量食少d
何況我地一直諗住生小朋友
食煙多都對大家唔好喇
不過經過我一番道理後
袁生已經開始食少左
所以今次就選擇煲花旗蔘湯俾袁生飲
因為之前係街市聽到人講話如果成日夜訓,食煙多,可以煲花旗蔘湯飲下
雖然袁太唔知有咩好處
但得閒煲下都幾好架
不過花旗蔘個味道我由細到大都唔太鍾意
所以都係偶然煲一次好喇!

~咸菜胡椒桂花魚湯~


材料:
新鮮雞(去皮)-半隻/猴頭菇-3個/花旗蔘,麥多,玉竹-適量/瘦肉-$10/蜜棗-2粒

做法:

<1>瘦肉飛水後切件,猴頭菇用水浸15分鐘,擠乾水份備用.
<2>
煲內放入適量的水,滾後加入所有材料用大火煲30分鐘.
<3>
再轉慢火煲約2小時,下少許鹽調味即可.

鴛鴦魚滑蒸蛋卷

前幾日睇電視介紹蒸蛋卷,好想食呀!
想食的話,梗係要自己試下整喇!
不過最難都係煎個蛋皮,
好彩屋企有好多雞蛋,可以慢慢試,嘻...嘻...
但煎好個蛋皮之後,包咩餡好呢
最近愛上左鯪魚滑同埋墨魚滑,
就用呢兩樣黎整個鴛鴦魚滑蒸蛋卷喇!
蒸完再用鮑汁去煮,
仲有西蘭花拌碟添!
雖然今次係第一次整,但好好食呀!
老公都好鐘意,
好呀!
但呢個餸食到一半已經好飽!




~鴛鴦魚滑蒸蛋卷~食譜

材料 : 雞蛋-8隻 / 西蘭花-1個 / 鯪魚肉-$10 / 墨魚滑-$20

                      獻汁 : 鮑汁 , 蠔油 , 水 - 適量
 

 

1.墨魚滑用少許雞粉,鯪魚肉用少許生抽,麻油,糖,胡椒粉略醃一陣,備用.
 
2.西蘭花用水灼一灼,撈起鋪在碟上,備用.
 
3.將8隻雞蛋分開2碗(1碗4隻)打起成蛋漿,加少許鹽調味.
 
4.落油起鑊,將2碗蛋漿分開下鑊用慢火煎成兩面金黃色,撈起,備用.
5.將一塊蛋皮(蛋皮下先放上保鮮紙,已方便卷起)包上鯪魚肉,卷起,另一塊蛋皮
  (蛋皮下先放上保鮮紙,已方便卷起)包上墨魚滑,卷起.
 
6.將兩條蛋卷除去保鮮紙後,用大火隔水蒸8-10分鐘.
7.待蛋卷蒸好後,切成件放上碟.
8.鑊中將獻汁煮滾,淋上蛋卷上,即可.

 
         

BB似唔似小魔怪???

仲記得9年前買BB番屋企的時候,
覺得BB好似小魔怪,
唔係淨係袁太話似架!
連袁生,袁太爸爸,媽媽,家姐,袁太的朋友仔都話似架!
不過唔經唔覺BB都九歲幾喇!
大家覺得BB仲似唔似小魔怪呢?

香港花卉展覽2011

去完玩具博覽之後,
順路梗係去埋花卉展喇!
袁生見我陪左佢去玩具博覽之後,
知袁太想去花卉展睇花,
就好慷慨咁陪袁太去埋花卉展喇!
仲影左好相相添!
其實如果袁太冇陪袁生去玩具博覽的話,
袁生又會唔會陪袁太去花卉展呢?



到達花卉展喇!

繡球花好靚呀!

好靚的菊花

大家覺得似咩呢?我就覺得好似荔枝

熊貓仔