蕃茄炆牛展

大家仲記得袁太上次燉牛尾湯個時留低的湯渣 , 西芹同甘旬嗎 ??? 最好的消滅方法就用來炆 , 一想就想到用來炆牛展 , 用我最愛的蕃茄來處理 ......



袁太見最近腰痛又好番少少 , 又想食牛牛 , 希望食完又唔會痛番呢 , 炆牛展我多數都係個幾樣做法 , 唔係用清湯炆 , 咖哩炆 , 就用蕃茄炆 , 三樣之中我最鐘意用蕃茄 , 因用蕃茄炆酸酸甜甜好開胃 , 無論拌飯或拌意粉都好味道 , 其實袁生唔太鐘意食蕃茄煮既餸 , 不過有佢鐘意的牛展 , 所以我用咩材料炆 , 佢都會接受 , 而且牛展炆到好"淋"身 , 多多碗飯或意粉都食得落呢 ^^



材料 : 急凍牛展 , 洋蔥 , 蕃茄 , 茄膏 , 湯渣(西芹,甘旬) (如冇湯渣,可只用1條甘旬代替) , 雞湯 , 芹菜 , 薑 , 冰糖 , 月桂葉 , 鹽 , 酒 , 黑胡椒碎 , 水

薑去皮切片 , 芹菜莖切段 , 湯渣中的西芹切細件 , 鑊中加入水 , 薑片及酒 , 放入牛展蓋上蓋用中火出水10分鐘 , 盛起用水沖一沖洗及瀝乾

蕃茄洗淨 , 洋蔥去衣 , 分別將蕃茄切件 , 洋蔥切幼絲

煲內加少油燒熱 , 將蕃茄及洋蔥放入爆香 , 加入湯渣中的西芹及甘旬拌勻 , 逐一放入牛展 , 茄膏 , 冰糖 , 月桂葉 , 雞湯 , 水及少許鹽調味拌勻

再放上芹菜莖及少許芹菜葉 , 用中火煲滾後 , 蓋上蓋轉慢火炆1 1/2小時 (期間每45分鐘將牛展反面再煮 , 如收乾水 , 可慢慢加水繼續炆) 

盛起牛展切片 , 放回鑊中繼續用慢火煮15分鐘後熄火焗30分鐘 , 先盛起牛展放上碟 , 將汁料用慢火煮熱淋上牛展面 , 再灑上黑胡椒碎及放上芹菜葉裝飾即可

材料
急凍牛展1條 , 洋蔥1個 , 蕃茄3個 , 茄膏2湯匙 , 湯渣(西芹,甘旬) (如冇湯渣,可用1條甘旬代替) , 雞湯300ml , 芹菜2扎 , 薑 , 冰糖4小粒 , 月桂葉2片 , 鹽 , 酒 , 黑胡椒碎 , 水3杯



做法
1. 薑去皮切片 , 芹菜莖切段 , 湯渣中的西芹切細件

2. 鑊中加入水 , 薑片及酒 , 放入牛展蓋上蓋用中火出水10分鐘

3. 盛起用水沖一沖洗及瀝乾

4. 蕃茄洗淨 , 洋蔥去衣 , 分別將蕃茄切件 , 洋蔥切幼絲

5. 煲內加少油燒熱 , 將蕃茄及洋蔥放入爆香 , 加入湯渣中的西芹及甘旬拌勻

6. 逐一放入牛展 , 茄膏 , 冰糖 , 月桂葉 , 雞湯 , 水及少許鹽調味拌勻

7. 再放上芹菜莖及少許芹菜葉

8. 用中火煲滾後 , 蓋上蓋轉慢火炆1 1/2小時
   (期間每45分鐘將牛展反面再煮 , 如收乾水 , 可慢慢加水繼續炆)  

9. 盛起牛展切片 , 放回鑊中繼續用慢火煮15分鐘後熄火焗30分鐘

10. 先盛起牛展放上碟 , 將汁料用慢火煮熱淋上牛展面

11. 再灑上黑胡椒碎及放上芹菜葉裝飾即可 




酸酸甜甜的蕃茄味 , 再配上淋身的牛展 , 好滿足呢 ^^