田園雞絲焗乳酪法包 <附食譜>

又到Happy Friday的時候

每當星期五都想為袁生或自己整個完美的早餐，不過可惜好多次都俾袁生拒絕了，次次都話 : 晨咁早起身整早餐咁辛苦，求求其其買個包咪算囉，唉 ... 雖然話出去買早餐係好方便，但點都唔夠自己親自整早餐咁好，何況我都唔係每個星期五都要求整早餐，只不過係一個月一次姐

不過袁生依然都係唔需要我整，但袁太係唔會放棄，所以就決定來一次先斬後奏，整左先算，段估整左袁生唔會唔食掛，前一日買定好材料，整定麵包，今日晨咁早起身開工

雖然好鬼眼訓，但希望袁生真係會食得開心，食得健康，我知平時袁生放假最喜愛的早餐一定係食牛扒炒蛋，但袁太廚房出品既一定而健康為主

所以就用蔬菜配雞肉，再加上乳酪醬，自家製小法包，味道清新又健康，不過由於冇時間煲奶茶，所以簡簡單單加盒牛奶，唔知袁生喜唔喜愛今日袁太為佢準備的愛心美味早餐呢 ???

好喇 ! 我要出門口上班lu，唔講住喇，Bye !

蘿蔔魚滑什菌湯 <附食譜>

夏天咁熱真係令人冇晒胃口，冇晒心情，所以呢幾日袁太都偷懶左幾日冇Upload Blog，見今日有番心情就清下食譜，每當夏天時候例牌都會用蔬菜，瓜類同菌類做晚餐材料，清清地得黎又健康，簡簡單單滾個湯，炒碟菜，蒸條魚就可以開飯

今日袁太為大家介紹一款湯水，雖然唔係用兩三個鐘煲出黎的老火湯，但勝在湯料有好多蔬菜同菇菇，一次過可以吸收唔同營養，另外再加上鯪魚滑，魚滑內加入蘿蔔，冬菇，芹菜拌勻，比起普通的魚滑味道更加豐富同美味

連平時唔多喜愛菜湯的袁生都有讚冇彈，同埋湯料夠晒多，真係飲一碗都夠飽飽，仲可以就咁加碗白飯入去，就可以變成湯飯，湯飯永遠係我夏天至愛，不過可惜袁生至討厭湯飯，都係簡簡單單當湯飲算lu !

自家製手打魚蛋 <附食譜>

袁太係一個喜愛吃魚蛋的人，無論小食店一串串的魚蛋還是雲吞麵店的魚蛋我都愛，但最愛莫過於係自家製，講開自家製魚蛋，係好耐好耐唔知幾多世紀年前整過一次咁多，但居然係唔好味

因為以前的袁太係唔喜愛入廚房，所以以前的煮藝多數都係失敗多，但唔經唔覺喜愛入廚房攪攪震已經十幾年了，廚藝當然漸漸進步，如果唔係都唔會開個Blog同所有Blog友分享入廚樂趣

其實自己整魚蛋都係一件容易的事，而且製作時間亦唔係太耐，不過袁太仲有一關要過，就係袁生個關，因袁生本身唔太愛魚蛋，佢話成日都覺得腥腥地，唔知今次自家製手打魚蛋可唔可以令到呢位仁兄對魚蛋從此改觀呢 ???

自家製魚蛋的主要材料 : 鮫魚

狗狗SET DINNER <附翠玉瓜吞拿魚乳酪沙律,甘旬免治牛貝殼粉,蕃薯餅食譜>

前幾日帶BB去睇醫生，因為之前BB無端端嘔又肚痾，真係嚇鬼死我，畢竟BB已經11歲半了，即刻打去診所BOOK睇獸醫，經醫生的檢查後，BB只係腸胃有少少唔舒服，食左幾日藥已經冇咩事

當日袁太同BB去睇醫生的時候，醫生問我 : 平時妳會俾咩BB食架 ??? 俾咩佢食，狗糧囉，當我好疑惑醫生點解會咁問的時候，醫生話雖然狗食狗糧係好正常，但日日食同一樣食物都幾悶，所以醫生就同袁太講，其實妳可以抽少少時間整個特別晚餐俾BB食下

等佢可以食多D唔同的食物，其實諗番轉頭，養左BB咁多年，我究竟煮過幾多餐俾佢食呢 ??? 又或者其實我係咪一個好主人呢 ??? 所以某日見有時間，決定整SET DINNER俾BB

所謂SET DINNER，當然有前菜(翠玉瓜吞拿魚乳酪沙律)，主菜(甘旬免治牛貝殼粉)，甜品(蕃薯餅)，仲有生果藍莓，全部材料都對狗狗有益，食多D都唔怕

翠玉瓜 : 營養比一般瓜類豐富，含豐富胡蘿蔔素，蛋白質，維生素A，B1，B2，C同E，其中所含的維他命A，碳水化合物及纖維，怩常吃的節瓜，絲瓜高，其中維他命A對小狗眼睛有良好幫助

吞拿魚 : 含豐富的蛋白質，礦物質，維他命，Omega-3S脂肪酸及DHA，有助腦部發展及眼睛視力的健康

乳酪 : 含豐富維他命B12，鈣，鈣質可強化骨骼，預防骨質疏鬆，並降低膽固醇

甘旬 : 含豐富胡蘿蔔素，維他命A，B，C，D，E，K，鈣，鉀，鐡，纖維含量極高，其中胡蘿蔔素有抗氧化及抗癌功效，有助狗狗眼睛健康，更有效降低膽固醇，血壓等功效

牛肉 : 脂肪少，是高蛋白質低脂肪的肉類食品，含豐富蛋白質，脂肪，維生素B1，B2，鈣，鐡，能增強免疫機能，強壯筋骨功效

蕃薯 : 含豐富維他命A，B，C，E，澱粉質及纖維，能幫助狗狗改善便秘及血管硬化等

雞蛋 : 含豐富蛋白質，維他命A，B，D，鐡，鈣等礦物質，維他命對狗狗眼睛有良好幫助，維他命D有助吸收鈣，鋅是皮膚和毛髮必須的礦物質，亦有助降低膽固醇

藍莓 : 含豐富鉀，纖維素，維他命A，C，E及其他多種維生素同礦物質，能預防癌症及心臟病，亦有護眼功效

 

 
唔駛10分鐘，BB已經全部K.O.晒，仲好似唔夠食，BB永遠都係袁太廚房出品的食物捧場客 !

西式晚餐 <附煙三文魚蘆筍水煮蛋,煙肉荔枝卷,海鹽焗薯條,香煎牛扒配芥末忌廉汁食譜>

袁太有一個好消息想同大家講，大家快d估下，好喇，倒數5，4，3，2，1 ... 時間到

大家估唔估到呢，認識我的人一定會估"係唔係有左BB???" 當然唔係，而係今日接到醫生的電話，我可以食牛，不過醫生話雖然可以食，但都唔可以食大多住，OK冇問題，我會控制份量，所以今日就叫袁生去買牛扒回來做晚餐

 

不過牛扒只不過係主菜，主菜前當然有前菜，前菜方面有煙三文魚蘆筍水煮蛋又係Jamie's Oliver出品，前幾日睇電視介紹過之後，我已經好想即刻整，今日終於可以整，簡簡單單清清地的配搭，真係啱晒我胃口，袁生亦都好喜歡

另外仲有煙肉荔枝卷，每當夏天有荔枝的時候，我都會用荔枝煮餸，今次的荔枝卷味道好特別，而且做法簡單，荔枝的香甜味平衡煙肉的油膩感，相當唔錯

仲有煎牛扒的汁料本身想用黑椒汁，但袁生又話想食芥末，咁唯有就下袁生整芥末忌廉汁，不過唔係好啱我，因我本身唔喜愛芥末，薯條方面都係自家製出品，焗薯條總比炸薯條較為健康，焗好後問袁生想用椒鹽還是海鹽，袁生話海鹽就海鹽喇 !

周打雞肉素翅湯 <附食譜>

袁生突然間話想飲西式湯，重要係夜晚十一點的時候提出，究竟袁生係咪想玩野呢 ???

不過既然開到口，我當然會煮個湯俾佢，但夜爛人靜，街市又收檔，超市又關門，咁事問我應該去邊度買材料呢 ???

好好彩地雪櫃百寶箱有材料可以整周打湯，但居然冇主要材料 : 蜆，雖然冇蜆但就有雞扒，咁就可以整周打雞肉湯，另外加左我至愛的素翅，大家覺得個賣相係咪高貴左呢，煮好後就俾袁生試下，袁生居然大讚話好好味，仲話初時叫我咁夜先煮湯，多數以為袁太會好簡單咁整罐頭湯俾佢飲，估唔到袁太會用雪櫃剩餘物資黎整個西式湯，真係唔到唔寫個"服"字俾我 !

又係沙律... <附西瓜皮鹹魚鮮蝦沙律食譜>

天氣悶熱，晚餐繼續沙律為主，不過今次的沙律唔係凍冰冰，而係暖笠笠

其實呢個沙律印象中係睇電視學，其實初時都冇諗過會整，因為覺得配搭總是怪怪的，不過呢幾日真係冇咩胃口，熱到個腦都塞晒，諗唔到究竟煮咩晚餐好，所以就決定整呢個沙律試下，但唔知袁生啱唔啱胃口呢 ???

另外見袁生日日屋企都熱到抽筋兼出晒汗，又知袁生喜愛雞尾酒，所以就決定奉獻我的第一次，就係自己調製雞尾酒，好簡單用橙，紅莓同伏特加做材料，就有一杯味道甜甜地又有酒味的一杯雞尾酒了，味道袁生都不知幾喜歡

另外個西瓜沙律方面，大家唔好以為材料配搭古怪就覺得唔好味，但其實味道都唔錯架，酸酸甜甜咁，夏天食都幾開胃，不過最估唔到西瓜的甜味同鹹魚的味道都可以夾得到，可以中和大家的味道 !

沙律汁方面需要用到椰糖，大家可以去東南亞材料店買

 

泰美味了... <附泰式肉碎生菜包食譜>

炎熱天氣之下又係唔想煮飯的日子，又或者平時放工太夜，梗本冇咩時間俾我諗煮咩餸好，雖然話好又一餐，唔好又一餐，但始終都覺得煮飯好過叫外賣，何況我發覺袁生最近好鐘意我煮飯，以前當我放工夜，袁生一定叫我唔好煮，求其買D食物回來吃就算，唔通我而家的廚藝進步得太多，令到一向喜愛出街食的袁生都喜愛回家吃飯的時候

我會唔會太高估左自己呢 ??? 嘻 ... 嘻 ...

好喇，每當天氣熱的時候，我都鐘意食酸酸地辣辣地的食物，可能覺得會開胃D，所以泰式料理永遠係我夏天的首選，今次就整左生菜包，用泰式香料烹調，再加上至愛的辣椒

真係"泰"好味了

不過我最擔心係袁生唔鐘意食，因為以前袁生講過用生菜包住黎食好麻煩喎，其實我覺得佢係包得冇技巧，所以D餡料成日都跌晒出黎，唉 ... 所以我呢個老婆為左袁生食得方便，所以就親自包俾袁生食，有時都要扮下恩愛先得 !

椒鹽大蝦仁 <附食譜>

袁生平時喜愛脆口的食物，例如 : 椒鹽鮮魷，椒鹽九肚魚等等 ...

不過成日驚會整得難食，因為袁太有前科架，記得好幾年前整過一次椒鹽鮮魷，嘩 ... 個次真係難食到不得了，可以話係我入廚咁多年煮得最難食的一道菜，不過經過時間磨練，今時今日的袁太應該冇咩問題，所以就決定整椒鹽蝦，希望會成功

本來想用新鮮蝦整，點知街市全部新鮮蝦都鬼死咁細隻，咁冇辦法，唯有去急凍店睇下有冇蝦仁賣先，點知好好彩俾我見到有大蝦仁，呢種size的蝦仁啱啱好，一包有18隻，價錢只不過係三十個大洋，都算便宜喎

講左咁耐，大家係咪好想知袁太今次的椒鹽食譜成唔成功呢 ??? 唔需要我講，大家看看以下的圖片都知成唔成功喇~yeah~好味 !!!

炎炎夏日之簡單晚餐

袁太又偷懶左幾日冇upload blog了，冇辦法，由於天氣實在太熱，令到個人都冇咩心情上網，懶下一日又一日，今日終於要upload下，因為我驚大家會唔記得左我

由於天氣太熱太焗，攪到我都唔想係廚房煮晚飯，大熱天時係廚房實在太辛苦了，唔駛15分鐘已經出晒汗，真係想大叫救命，但其實唔想飯都可以有好多選擇

例如 : 沙律，麵包，生果，冷盤等等 ...

所以袁太就一口氣整左好多食物，全部都係易入口凍冰冰的食物，真係唔錯，唔通炎炎夏日要我食粥做晚餐咩 ???

何況袁生對今次的晚餐讚不絕口，點解 ...

因為全部都係袁生鐘意食的野，眼見袁生最近都熱到冇咩胃口，所以我呢個老婆就整左比較簡單又好味的食物當晚餐，希望袁生食完可以消下暑，涼一涼個身體降下溫喇 !