投訴 <附茶葉煙燻豉油雞食譜>

自從可以食雞之後，真係餐餐都想去街市買雞做料理，今日又黎整雞，突然好鬼想食豉油雞，但最近臨近清明節，開始多人去掃墓拜山，去燒味店居然冇晒豉油雞，我頂...唔係掛，咁咪冇得食，但我今日真係好想食雞呀~~~

不過唔駛怕，燒味店隔離就係雞檔，去買半隻新鮮雞自己整豉油雞，不過我入廚房咁耐都未曾自己動手整豉油雞，但我相信應該唔會好難，下午的時候就係廚房攪掂隻雞，其實整豉油雞真係唔太難，話咁快就完成，但當見到隻豉油雞的時候，袁太又係度諗 : 難得自己整雞，咁不如去盡D整埋燻雞，何況屋企有茶葉，不過係香片茶葉，我諗味道都應該唔差，但係屋企整燻雞真係好鬼大煙

唔駛幾分鐘成間屋都俾煙所困，最攪笑莫過於袁生，因袁生當時係房內訓覺，訓醒行去廳見咁大煙，即刻衝入廚房問我發生咩事，我話冇事，只不過係度燻緊隻雞，袁生就話我煮野越來越新穎，遲早成間屋都俾我燒埋，唉 ... 為左俾佢定驚兼補鑊，就留番隻大雞脾俾佢開心下喇 !

泰式燒豬頸肉 <附食譜>

最近袁生袁太都喜愛食東南亞料理，自從上次整左泰式豬頸肉之後，簡直可以話從此愛上了
，所以今次就再一次挑戰豬頸肉，不過製作方法就同之前的有所不同

除左醃料方面，上次就用煎，今次就選擇用焗的方法，點解 ??? 因為方便囉

醃完後放入焗爐就可以，唔駛睇火，而且我覺得用焗的方法總比煎的方法還要香口，另外再加泰式甜辣醬一齊食，真係perfect到暈，簡直食到唔停口，咁好味的泰式豬頸肉，我相信如果到時用來招呼朋友，一定會好受歡迎 !