豆角粒白飯魚煎蛋

記得細細個的時候,
媽咪,婆婆成日都會整白飯魚做餸,
所以白飯魚可以話係由細食到大,
但最近已經好少整黎食,
以前同袁生拍拖的時候,
曾經整個一次俾佢食,
但袁生個時話袁太整得唔好食,
所以從始之後就冇再整過喇!

今日袁太因為諗唔到煮咩餸的關係,
突然醒起白飯魚呢樣野,
所以決定買黎今晚做晚餐,
以前十蚊已經可以買到好多,
但而家十幾蚊都係得少少,
不過其實白飯魚係咪離不開都係用黎煎蛋的呢
希望今次整得好食過以前,
袁生會鐘意食喇!

~豆角粒白飯魚煎蛋~食譜

材料 : 白飯魚-$15 / 豆角粒-6條 / 雞蛋-5隻

1.先將雞蛋拌勻,加少許生抽調味.
2.豆角切粒後,豆角用少許雞湯煮一煮去掉腥草味,撈起,備用.
 
3.白飯魚洗淨抹乾,用少許鹽,油,胡椒粉醃好.
 
4.燒紅鑊,用少許油將白飯魚輕炒至開始轉白色及迫出水份,將白飯魚撈起隔水.
 
5.將白飯魚,豆角粒放入蛋液內一同拌勻.
6..燒紅鑊,將1湯匙的蛋液放入鑊內,用鑊鏟將蛋餅對摺成蛋角,即可

木瓜海底椰栗子排骨湯

袁太平時一放假就會煲湯俾袁生飲,
但有時諗煲咩湯,都諗到頭都大埋,
因為袁生有太多湯唔飲喇!
雖然煲湯係有好多材料配搭,

但好多湯,例如用藥材煲的湯,袁太就好少煲,
因為驚袁生唔鐘意,
但有一個辦法可以令到
袁生肯飲平時唔鐘意飲的湯,
就係袁太媽咪煲的湯喇!
袁太媽咪平時多數會用藥材煲湯,會叫袁太番屋企攞!
但同袁生講d湯係媽咪煲的,
袁生無論係咩湯都會飲!究竟點解呢
唔通始終都係媽咪煲的湯最好?

而袁太今次就選擇左用木瓜,海底椰煲湯,
其實我知袁生應該都唔太鐘意,
因為用木瓜煲湯會好甜,
所以就加埋栗子,雞腳,排骨一齊煲,
希望可以中和番個味道喇!
呢個湯真係有好多湯渣,
淨係食湯渣都夠飽喇!同埋好好飲添!

~木瓜海底椰栗子排骨湯~食譜

材料 : 木瓜-1個 / 海底椰-6個 / 栗子-16粒 / 紅蘿蔔-1條 / 雞腳-4隻 / 排骨-$30 / 蜜棗-2粒 /
                               南北行-少許

做法:
1.排骨飛水,備用.

2.雞腳剪去腳甲後出水,放入凍水30分鐘.
3.木瓜去皮去籽,紅蘿蔔去皮切大件備用.

4.煲內放入適量的水,滾後放入蜜棗,南北行,栗子,排骨用大火煲30分鐘.
5.再加入木瓜,紅蘿蔔,海底椰用大火煲30分鐘,轉慢火煲30分鐘,再下雞腳煲30分鐘,下少許鹽調味,即可.

薑蔥金銀蒜蒸比目魚

袁生平時就最鐘意食海鮮,
所以晚餐好多時都會煮魚俾袁生食,
無理由成日都整桂花魚架!
但袁生又唔多鐘意食煎魚,
而袁太最鐘意的鯇魚就更加唔駛諗,
袁生一定唔會食,
咁究竟今晚煮咩魚食好呢

去急凍鋪買肥牛的時候,
見到有比目魚賣,
好似幾靚,何況3條都係$47,
又好似唔係好貴,
咁就買一包番屋企做晚餐喇!
不過唔係煎,係用蒸的方法去煮,
就咁用薑蔥蒜蓉蒸,
簡簡單單又好味!



~薑蔥金銀蒜蒸比目魚~食譜

材料 : 比目魚-3條 / 薑-3片(切絲) / 蔥-適量(切段) / 蒜頭-適量

 

1.比目魚洗淨,抹乾,用少許鹽,胡椒粉醃好.
2.將蒜頭剁成茸.
 
3.燒紅鑊,加入半份蒜茸,慢火炸至金黃色,取出隔油成金蒜.
4.再燒紅鑊,加入剩餘的蒜茸,爆香,加入少許雞粉,糖,鹽調味,拌入金蒜.
5.蔥段放上碟後,再放比目魚,加入少許薑絲,金銀蒜,豉油.
6.用大火隔水蒸10分鐘即可.