通告

由於Yahoo Blog將於12月關閉了


袁太Blog會於 : http://elanie-kitchen.blogspot.hk/  繼續操作



另外袁太在facebook開了新page

大家可到fanpage like左先，可以大家保持聯繫

因我唔想同大家失散，大家一定要記住我呀 ~~~


https://www.facebook.com/Elaineskitchen

好緊張呀~~~

之前大家記唔記得袁太講過

會係1月22號的時候做手術，不過好可惜 ...

因為上次再做檢查的時候

醫生話個瘤大左喎，所以就幫我提前個手術日期

就係後日，即係10號喇

突然間早左咁多日做手術，心情真係又緊張，又驚

雖然醫生成日同我講

今次係一個小手術，手術做幾粒鐘，做完手術係醫院訓一晚
冇咩問題的話，通常就可以出院架喇

都唔知真係咁簡單

定係醫生知我怕怕，所以講吒番說話黎安慰我呢 ???

不過點都好喇

始終手術做D早，對我黎講都唔係一個壞處黎既

袁太明晚就要入院等做手術

手術後又要係屋企休養，所以"袁太廚房"暫時又要休息一下喇

唔知袁太明晚入左院

袁生係屋企會唔會訓唔著呢 ???

而BB會唔會又等我門呢 ???

始終都要做手術

之前因為腰痛照X光，得出個結果係腰椎間盤突出症，以為可以食藥或者做下治療就冇事，
不過醫生為左穩陣起見，叫我照多次，就轉介左去專科到照，點知一照下就照出原來腰背側位置生左個瘤，仲要兩個黏住一齊，好似雙胞胎咁，一大一細，雖然醫生話未屬於嚴重的階段，但都話要做手術，咁究竟係嚴重定唔嚴重呢 ???

攪到我都有少少驚驚地添，初初我諗住咩人都唔講，只要入院做完手術就OK，就連袁生，媽咪爹地，老爺奶奶都唔想講，因為唔想太多人為左我要做手術而擔心，但因為做手術要用醫療咭，所以一定要同袁生講，始終張醫療咭係袁生公司的福利

點知同袁生講左之後，佢要我同媽咪奶奶佢地講聲，令到大家最近咁擔心，日日打黎問我條腰有冇痛，行路盡量慢慢行，唔好行得太急之類等等...

不過我最睇得出袁生真係好擔心，我已經叫左佢好多次唔駛擔心，今次係做微創手術，風險唔大架，何況又唔係咩大手術，做完之後住一兩晚院就冇事喇，不過袁生話雖然唔係大手術，但始終要麻醉同開刀，一定會擔心，所以而家袁生唔俾我入廚房煮飯，連星期日放假都唔俾我煮，一個字講晒"慘"

最慘係我出年一月尾先做，咁咪成個月都冇得煮飯，咁個廚房咪要提早收爐 ??? 咁我個Blog點算呀 ???

不過大家可以放心，我部電腦仲有好多食譜仲未曾Upload上Blog，所以就算我而家暫時冇得煮飯，我都仲有好多野可以Upload上黎，我係唔會俾我個Blog暫停架

好喇，今日講住咁多先，明天繼續 !