2012年10月24日 星期三

青紅蘿蔔海底椰排骨湯 <附食譜>

上次煲海底椰湯用剩半包,記得之前賣菜姐姐話用唔晒的海底椰最好放入冰箱大約兩星期左右,以袁太咁冇記性的人,梗係拿拿臨清埋d海底椰,到時又唔記得放左係冰箱,何況最近天氣涼涼地,身體開始有少許唔舒服,喉嚨好乾不特止,夜晚仲咳到飛起,所以煲番個海底椰湯潤下都唔錯


另外袁生依然都係食咁多煙,飲滋潤湯水補番下個身體都好好,不過我都知袁生唔太好甜的湯水,但可惜冇得選擇,發言權係袁太呢邊,袁太要煲咩湯水,袁生就要飲咩湯水


大家覺得袁太係咪好霸道呢 ??? 不過袁生今次都好乖,叫佢飲多d,佢真係飲左兩大碗咁多 !


2012年10月23日 星期二

香煎蘿蔔烙 <附食譜>

之前一直知道潮州有樣食物叫"水瓜烙",但印象中好似未食過,又或者以前細個可能食過,但都唔記得,所以袁太就諗住試下整黎食,但好可惜搵唔到有水瓜賣,唯有將水瓜轉用其他材料,一於用我地兩公婆都鐘意食既野,就係白蘿蔔

其實整呢個蘿蔔烙同整蠔餅的做法都係差唔多,餡料除左白蘿蔔外,仲有菜脯同蝦米,由於加左蕃薯粉的關係,半煎炸到脆卜卜


大家唔好睇個賣相樣衰衰,以為唔好食,其實好香口,好好味,同埋因為袁太比較鐘意燶少少,所以就煎燶d,但估唔到原來袁生都鐘意燶燶地,脆口的食物,幾乎全部燶個邊都比袁生食晒,不過算喇,袁生咁鐘意食,成碟俾晒佢食都冇所謂喇 !

2012年10月22日 星期一

腐竹白果薏米湯丸糖水 <附食譜>

天氣開始涼涼地,除左煲雪梨水之外,偶然煲滋潤糖水食下都唔錯,所以袁太今次就煲左"腐竹白果薏米湯丸糖水",淨係聽個名都知好足料,以前袁太好鬼憎食白果,奉有白果的野都唔好預我,但唔知點解今次突然好想加埋白果一齊煲

其實白果都唔係想像中咁難食,另外再加埋湯丸,湯丸又係自己包,因為上次中秋節包湯丸的時候,淨左好多芝麻餡喎,冇理由掉晒佢,而白果方面,初初諗住買己處理好的白果番黎煲,但個呀姐話呢d煲出黎冇咩白果未,要煲白果糖水就買有衣個d自己番去處理喎,OK,咁就買有衣個d


其實呢款糖水食一碗已經飽到想嘔,又白果,又薏米,所以唔駛加雞蛋已經好飽肚,同埋呢款糖水好有益,雖然好飽,但袁太都食左兩碗咁多,好滿足 !

2012年10月21日 星期日

BB可愛的一面

袁太屋企附近有間廟,一到農曆七月,國慶,佛誕等等...

都會有班人大鑼大鼓,唔知又邊到出發,沿住馬路行去廟宇到,雖然就唔係好關我事,但次次都晨早八點幾就嘈到死,平日係咁,星期六又係咁,其他人唔駛訓咩

何況我家有隻老狗BB係度,大家知喇,狗的耳朵好靈敏,我同袁生都未聽到,BB就已經俾d聲嘈醒左,唔駛問,一定就係咁吠,BB仲走左出廳,跳上窗到望下出面做咩會咁嘈,袁太梗係唔會放過BB咁得意的時刻,即刻攞部電話出黎影低佢

大家係咪覺得BB好可愛呢 ??? 仲有個鼻好扁,真係一隻可愛的扁鼻豬 !




2012年10月17日 星期三

鮮蝦雜菜湯 <附食譜>

前幾日買左娃娃菜放係雪櫃好似仲未食晒,但得番兩棵咁多多,用黎炒又少得滯,所以就決定滾湯,但用黎滾湯都要想一想用咩材料好,突然個腦閃一閃好想飲雜菜湯,咁就一於煮雜菜湯,袁生應該唔會反對,何況就算問佢都係例牌一句"是但喇"

咁雜菜湯究竟用咩菜好呢 ???


其實都係用自己鐘意的蔬菜都可以,而屋企就有娃娃菜,咁去街市買蕃茄,椰菜就夠晒,當係街市買完晚餐材料,經過海鮮檔,俾我見到有基圍蝦喎,全部都好生猛,忍唔住手之下買左十蚊,但究竟我買黎做咩呢 ???

所以就決定加埋入雜菜湯內一齊煮,煮出黎的味道其實有少少複雜(呢句係袁生講既),有蕃茄的酸味 + 蝦的鮮甜味,其實整體上我都覺得味道唔錯,幾特別 !


2012年10月16日 星期二

海鮮醬鴨肉夾餅 <附食譜>

某一日袁生突然話想食類似北京填鴨的食物,記得以前袁太都整過類似的食物,好簡單咁去街市買燒鴨,青瓜,雪櫃有海鮮醬,而皮方面就用春卷皮代替,當然係冇咁好食,因為春卷皮太薄同好硬,好鬼難咬

所以今次袁太就要想下辦法,究竟點整先好呢 ??? 辦法係一於自己搓個麵糰整個夾餅


而夾餅的餡料初時袁太想用鴨胸肉,但最衰袁生唔鐘意鴨胸肉,所以當然用燒鴨同青瓜粒,同埋最緊要唔少得的海鮮醬,其實入面的燒鴨片應該切得薄d,但袁生又話鐘意啖啖肉,叫我切厚d,咁我為有照做


不過由於係自己整夾餅,都幾驚會失敗,好好彩個夾餅好成功,雖然同袁生之前所講的北京填鴨係有好大分別,但都係用鴨,青瓜,海鮮醬,最緊要好味咪得囉,而袁生的評語係冇出聲,冇評語,袁太整左六個,袁生食左四個,咁其實袁太唔駛問,都知袁生滿唔滿意喇 !

2012年10月12日 星期五

牛蒡猴頭菇無花果瘦肉湯 <附食譜>

又再推介一款牛蒡湯俾大家,雖然袁太唔知有腳痛的朋友飲左牛蒡湯或者土伏岑湯後,對腳患有沒有幫助,但我家袁生就好有效,每次煲完俾佢飲之後,訓醒後都話冇咁痛,其實到而家都唔知係袁生心理作用還是因為袁生好乖咁戒左d唔應該食既野所致呢 ???

不過既然牛蒡湯對袁生有效,所以袁太而家必定一個星期煲一次俾袁生飲,而今個星期袁太所煲的牛蒡湯就加左好多材料一齊煲


除左材料必定有牛蒡外,仲有猴頭菇,無花果同雪耳

 
因為加左無花果同雪耳,碗湯變得好滋潤,最啱最近涼涼地的天氣飲用 !


2012年10月11日 星期四

亂炒一通 <附炒生菜食譜>

點解會叫亂炒一通 ???

其實初初去街市買左1斤生菜做晚餐,諗住簡簡單單用蒜蓉炒,但又好似冇咩新意,左諗右諗究竟用咩材料炒好,當袁太係廚房望主放配料個玻璃樽的時候,就靈機一觸,其實可以試下加多d配料一齊炒

例如 : 薑,蒜頭,辣椒,總知有咩材料就放落鑊到連同生菜一齊炒,就係因為有咁多材料,
所以袁太就叫d配料做混醬,亦由於係將廚房有咩材料就用咩材料的原固,所以就有呢個"亂炒一通"的名字



大家煮開野食的朋友都知道,其實本身將薑,蒜頭呢種配料落鑊爆炒就已經好香,所以加埋生菜一齊炒,另外我仲加左少少蝦醬,生菜吸晒所以爆香材料的味道,簡直出乎意料之好味,雖然只係一碟普通炒生菜,但就連平時好麻煩的袁生都話好好味 !

2012年10月10日 星期三

又到10月10日,結婚兩週年

話咁快又到10月10日的大日子,咩大日子 ??? 咪就係當時的黃小姐簽紙嫁俾袁生的日子,
時間真係過得好快,仲記得前年的今日,袁太好鬼緊張,前一晚仲訓唔著,因為新郎新娘結婚前一日係唔可以見,所以袁太都好乖番娘家休息,仲記得個日仲同袁生傾電話傾到凌晨四點幾,唔知袁生今年會同袁太去邊度慶祝呢 ???

其實之前都問過袁生會去邊,但袁生只說 "唔話妳知,到時咪知囉",超 ... 駛唔駛咁神秘呀,
攪到我好想快d到聽晚,到時就可以開估,見又到結婚週年,所以袁太有睇番當時影的婚紗相同埋擺酒的相,當然都要post少少相上blog同大家分享 !















2012年10月6日 星期六

梅菜鴨 <附食譜>

最近袁生發覺每次食左雞之後,隻腳都會痛,所以袁太廚房要暫時禁煮雞,其實冇得煮雞真係好慘,因為雞有好多唔同的煮法,最重要係袁太都幾鐘意食雞,不過為左袁生,唯有忍耐下

但平時晚餐一定要有肉類,除左雞,離不開都係豬,牛,羊個類,其實煮得多都幾悶,所以今次就選擇煮平時好少會煮的材料,而個樣材料就係鴨,整呢個梅菜鴨真係要平時好多時間係屋企先可以煮,因為由醃到煮都足足用左五個鐘,不過長時間煮唔緊要,最緊要好味道

平時我唔多會煮鴨,因為買半隻鴨已經好多,兩個人都驚食唔晒,不過就算食唔晒,都可以放係雪櫃留待第二日,當袁太係廚房一路處理緊隻鴨的時候,袁生就入廚房話"好香喎"整緊咩呀 ???

冇呀,整緊梅菜鴨,第一次整咋,唔知好唔好味,好喇,整左五個鐘的梅菜鴨,終於攪掂


估唔到第一次整已經咁好味,梅菜同d汁簡直送飯一流,初初仲驚隻鴨太大食唔晒,但唔駛30分鐘,已經俾我地我個食晒落肚 !

2012年10月5日 星期五

林柿雪糕 <附冇雪糕機食譜>

雖然中秋已過,但依然回味中秋時的節慶食品,而袁太今次要為大家介紹,就係"林柿雪糕"

林柿只係中秋時節先有得買,平時多數都係當飯後果,但今年就嘗試用林柿黎整雪糕,仲記得當我去街市買左林柿番屋企的時候,就同袁生講d林柿係用黎整雪糕架,唔好偷食呀,袁生聽到當堂嚇窒左,佢話"唔係呀,用林柿整雪糕 ??? 咁怪雞,會唔會好難食架 ???"

其實我都唔知應該點答,因為我自己都驚會唔好味,何況係第一次整,根本唔知味道會係點,不過既然都買晒材料,點都要試下整,唔整的話永遠都唔知味道會係點,可能會好好味呢,其實整呢個雪糕真係好鬼簡單,而且用番林柿個皮黎做器皿,都幾特別,整完之後放左係冰箱一晚,終於有得食


袁太整左四個,仲俾左兩個媽咪同爹地試下,唔知佢地覺得味道得唔得呢,平時袁太有個習慣,如果整左樣食物出黎,自己都冇咩信心的話,我首先會搵袁生做白老鼠,當袁生覺得味道許可,我先會去試,大家覺得袁太係咪好賤呢

好喇,係時候都大家講下個味道,我袁太可以係到同大家講,個林柿雪糕係好好味,啖啖的林柿肉配上香滑的雪糕,簡直一流,下年一定要再encore先得 !

2012年10月2日 星期二

下午茶之選 : 花生醬香蕉西多士 <附食譜>

話咁快假期又到最後一日,明天又要開始上班,心情簡直跌落谷低,今朝一早起身整左個愛心早餐俾袁生嘆,夜晚要去同老爺奶奶食飯,本來以為廚房今晚可以休息一天,點知 ...

到下午時份,當袁太小睡片刻的時候,袁生突然係我耳邊講,我好似有d肚餓,有冇野食呀,
有,屋企咩野食都有,例如 : 薯片,麵包,雪糕,蛋糕咩都有,但袁生又話唔想食呢d,唉...咁麻晒架,袁太突然醒起,好似仲有幾片方包,咁我就同袁生講,不如整西多士俾你食,好唔好,因為平時去茶餐廳食下午茶,西多士都係袁生常叫,另外仲有花生醬同香蕉,一於用黎做餡,加左香蕉的西多士,唔知味道會係點既呢 ???


整一份西多士所需要的時間都唔駛15分鐘就有得食,真係好方便,因為所有材料都係屋企好容易就搵到,袁太整左兩份,我同袁生就一人一份,初時仲擔心加左香蕉的話,驚味道會好怪,因為我一向都唔係太鐘意熱食的生果,但估唔到又幾好味,個味道都幾特別,同埋就咁整已經好夠味,都唔需要再加牛油同糖漿都可以,大家有機會都試下 !

2012年10月1日 星期一

中秋節之團圓雙色湯丸 <附綠茶紅豆湯丸 , 南瓜芝麻湯丸食譜>

中秋節的最佳甜品,莫過於係食湯丸,正所為"中秋節食湯丸,寓意家人團圓"

雖然中秋已過,但袁太都係度祝大家"中秋節快樂",以前袁太都為求貪方便,都會係超市買一包包的湯丸+片糖就攪掂,但今年突然間發左顛,想自己搓湯丸,初時同袁生講,袁生就話:買現成咪算,做咩咁辛苦自己包,放假就休息下,唉...袁生都唔了解我既,就係因為放假,所以先咁得閒,同埋有咁多時間去搓湯丸


當我同袁生講,我諗住整綠茶紅豆湯丸的時候,袁生聽到後即刻轉晒軚,話陪我落街買材料番屋整,當然,因袁生至愛綠茶紅豆的食物,無論綠茶紅豆沙冰或者綠茶紅豆泡芙,總知奉有綠茶紅豆的食物,佢都來者不拒


不過當袁生陪我去買材料的時候,就話買完番去之後就陪我一齊整,到我係廚房整緊材料的時候,點知袁生就走去訓左覺,我頂,有冇攪錯呀,不過算數喇,我自己整都係一樣,雖然搓好的湯丸係樣衰左d,但煮完味道唔錯架 !

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......