梅菜鴨 <附食譜>

最近袁生發覺每次食左雞之後，隻腳都會痛，所以袁太廚房要暫時禁煮雞，其實冇得煮雞真係好慘，因為雞有好多唔同的煮法，最重要係袁太都幾鐘意食雞，不過為左袁生，唯有忍耐下

但平時晚餐一定要有肉類，除左雞，離不開都係豬，牛，羊個類，其實煮得多都幾悶，所以今次就選擇煮平時好少會煮的材料，而個樣材料就係鴨，整呢個梅菜鴨真係要平時好多時間係屋企先可以煮，因為由醃到煮都足足用左五個鐘，不過長時間煮唔緊要，最緊要好味道

平時我唔多會煮鴨，因為買半隻鴨已經好多，兩個人都驚食唔晒，不過就算食唔晒，都可以放係雪櫃留待第二日，當袁太係廚房一路處理緊隻鴨的時候，袁生就入廚房話"好香喎"整緊咩呀 ???

冇呀，整緊梅菜鴨，第一次整咋，唔知好唔好味，好喇，整左五個鐘的梅菜鴨，終於攪掂

估唔到第一次整已經咁好味，梅菜同d汁簡直送飯一流，初初仲驚隻鴨太大食唔晒，但唔駛30分鐘，已經俾我地我個食晒落肚 !



梅菜鴨
材料(4個份量) : 米鴨<半隻>，梅菜<1棵>，薑<3片>，冰糖<3粒>(中size)


做法 :

1. 鴨洗淨抹乾，用老抽，紹酒塗滿鴨的外內，蓋上保鮮紙醃3小時

2. 梅菜浸水30分鐘後洗淨，切粒備用

3. 待鴨醃好後，燒紅鑊，將鴨用大火煎至兩面金黃色

4. 加入3碗水的份量，再加入少許生抽，老抽，冰糖調味

5. 待滾後，轉慢火加蓋炆1小時，熄火焗30分鐘，再用慢火煮30分鐘至滾

6. 將鴨盛起斬件放上碟，再將鑊中的梅菜連汁料倒在鴨上即可