林柿雪糕 <附冇雪糕機食譜>

雖然中秋已過，但依然回味中秋時的節慶食品，而袁太今次要為大家介紹，就係"林柿雪糕"

林柿只係中秋時節先有得買，平時多數都係當飯後果，但今年就嘗試用林柿黎整雪糕，仲記得當我去街市買左林柿番屋企的時候，就同袁生講d林柿係用黎整雪糕架，唔好偷食呀，袁生聽到當堂嚇窒左，佢話"唔係呀，用林柿整雪糕 ??? 咁怪雞，會唔會好難食架 ???"

其實我都唔知應該點答，因為我自己都驚會唔好味，何況係第一次整，根本唔知味道會係點，不過既然都買晒材料，點都要試下整，唔整的話永遠都唔知味道會係點，可能會好好味呢，其實整呢個雪糕真係好鬼簡單，而且用番林柿個皮黎做器皿，都幾特別，整完之後放左係冰箱一晚，終於有得食

袁太整左四個，仲俾左兩個媽咪同爹地試下，唔知佢地覺得味道得唔得呢，平時袁太有個習慣，如果整左樣食物出黎，自己都冇咩信心的話，我首先會搵袁生做白老鼠，當袁生覺得味道許可，我先會去試，大家覺得袁太係咪好賤呢

好喇，係時候都大家講下個味道，我袁太可以係到同大家講，個林柿雪糕係好好味，啖啖的林柿肉配上香滑的雪糕，簡直一流，下年一定要再encore先得 !



林柿雪糕
材料(4個份量) : 林柿<4個>，雞蛋黃<2隻>，牛奶<80g>，淡忌廉<100g>，砂糖<40g>

做法 :
1. 林柿切去頂部，將林柿肉取出，留下林柿外皮備用

2. 蛋黃與砂糖拌勻，牛奶煮至微熱後倒入蛋糊內攪至糖溶

3. 淡忌廉打至7成，加入做法<2>的材料內，再加入林柿肉拌勻

4. 倒入玻璃器皿中，放入冰箱雪大約兩個鐘

5. 待完全凝固後用匙羹或雪糕羹爪鬆一次，放入林柿皮內，再放入冰箱雪凍即可