下午茶之選 : 花生醬香蕉西多士 <附食譜>

話咁快假期又到最後一日，明天又要開始上班，心情簡直跌落谷低，今朝一早起身整左個愛心早餐俾袁生嘆，夜晚要去同老爺奶奶食飯，本來以為廚房今晚可以休息一天，點知 ...

到下午時份，當袁太小睡片刻的時候，袁生突然係我耳邊講，我好似有d肚餓，有冇野食呀，
有，屋企咩野食都有，例如 : 薯片，麵包，雪糕，蛋糕咩都有，但袁生又話唔想食呢d，唉...咁麻晒架，袁太突然醒起，好似仲有幾片方包，咁我就同袁生講，不如整西多士俾你食，好唔好，因為平時去茶餐廳食下午茶，西多士都係袁生常叫，另外仲有花生醬同香蕉，一於用黎做餡，加左香蕉的西多士，唔知味道會係點既呢 ???

整一份西多士所需要的時間都唔駛15分鐘就有得食，真係好方便，因為所有材料都係屋企好容易就搵到，袁太整左兩份，我同袁生就一人一份，初時仲擔心加左香蕉的話，驚味道會好怪，因為我一向都唔係太鐘意熱食的生果，但估唔到又幾好味，個味道都幾特別，同埋就咁整已經好夠味，都唔需要再加牛油同糖漿都可以，大家有機會都試下 !



花生醬香蕉西多士
材料(1個人份量) : 方包<2片>，雞蛋<1隻>，牛奶<2湯匙>，香蕉<1/2隻>，花生醬<適量>

做法 :
1. 雞蛋與牛奶打勻，香蕉去皮切片，方包切去麵包皮備用

2. 將麵包的其中一面塗上花生醬，然後放上香蕉片，另一塊麵包同樣塗上花生醬

3. 將有花生醬那面蓋在香蕉片上，然後整塊沾上蛋漿

4. 鑊中加入大量油，燒滾後放入三文治以半煎炸方式至兩面金黃

5. 盛起吸取多餘油份即可