海鮮醬鴨肉夾餅 <附食譜>

某一日袁生突然話想食類似北京填鴨的食物，記得以前袁太都整過類似的食物，好簡單咁去街市買燒鴨，青瓜，雪櫃有海鮮醬，而皮方面就用春卷皮代替，當然係冇咁好食，因為春卷皮太薄同好硬，好鬼難咬

所以今次袁太就要想下辦法，究竟點整先好呢 ??? 辦法係一於自己搓個麵糰整個夾餅

而夾餅的餡料初時袁太想用鴨胸肉，但最衰袁生唔鐘意鴨胸肉，所以當然用燒鴨同青瓜粒，同埋最緊要唔少得的海鮮醬，其實入面的燒鴨片應該切得薄d，但袁生又話鐘意啖啖肉，叫我切厚d，咁我為有照做

不過由於係自己整夾餅，都幾驚會失敗，好好彩個夾餅好成功，雖然同袁生之前所講的北京填鴨係有好大分別，但都係用鴨，青瓜，海鮮醬，最緊要好味咪得囉，而袁生的評語係冇出聲，冇評語，袁太整左六個，袁生食左四個，咁其實袁太唔駛問，都知袁生滿唔滿意喇 !




海鮮醬鴨肉夾餅
材料(夾餅) : 中筋麵粉<150g>，酵母，鹽<2g>，砂糖<10g>，水<80g>，油<5g>
材料(餡料) : 燒鴨胸肉(切厚件)<1條>，青瓜(切粒)<半條>，海鮮醬<適量>


做法 :
1. 酵母及水拌勻攪至酵母溶化

2. 再砂糖，麵粉，油，鹽加入做法<1>的酵母水內，用膠刮混合至粗糙的麵糰

3. 將麵糰放於枱上，搓成光滑而有彈性的麵糰

4. 將麵糰搓成球狀，放於大碗內，用保鮮紙包好，放在室溫約1小時，讓麵糰發酵成兩倍大

5. 待麵糰發酵好後，用木桿將麵糰擀薄成長方形

6. 用圓形模壓出6個圓形，每個圓形上掃上一層油，再用木桿輕輕將圓形擀成隋圓形後，對摺成半圓形

7. 碟上放上牛油紙，將對摺半圓形放在牛油紙上，蓋上蓋靜置10分鐘

8. 鑊中放入凍水，將碟放於鑊中，隔水用大火將水煲滾後，轉中火蒸10分鐘，盛起待涼

9. 將海鮮醬塗在夾餅內，再放上燒鴨，青瓜粒即可