鮮蝦雜菜湯 <附食譜>

前幾日買左娃娃菜放係雪櫃好似仲未食晒，但得番兩棵咁多多，用黎炒又少得滯，所以就決定滾湯，但用黎滾湯都要想一想用咩材料好，突然個腦閃一閃好想飲雜菜湯，咁就一於煮雜菜湯，袁生應該唔會反對，何況就算問佢都係例牌一句"是但喇"

咁雜菜湯究竟用咩菜好呢 ???

其實都係用自己鐘意的蔬菜都可以，而屋企就有娃娃菜，咁去街市買蕃茄，椰菜就夠晒，當係街市買完晚餐材料，經過海鮮檔，俾我見到有基圍蝦喎，全部都好生猛，忍唔住手之下買左十蚊，但究竟我買黎做咩呢 ???

所以就決定加埋入雜菜湯內一齊煮，煮出黎的味道其實有少少複雜(呢句係袁生講既)，有蕃茄的酸味 + 蝦的鮮甜味，其實整體上我都覺得味道唔錯，幾特別 !


鮮蝦雜菜湯
材料 : 娃娃菜<2棵>，椰菜<半個>，蕃茄<2個>，基圍蝦<半斤>


做法 :
1. 娃娃菜，椰菜洗淨切好，蕃茄洗淨切件備用

2. 基圍蝦洗淨抹乾水份

3. 煲內放入適量水，待滾後加入蕃茄煮至軟身後，盛起蕃茄皮不要

4. 再加入椰菜及娃娃菜煮30分鐘，最後加入基圍蝦轉慢火煮45分鐘，下少許鹽調味即可