投訴 <附茶葉煙燻豉油雞食譜>

自從可以食雞之後，真係餐餐都想去街市買雞做料理，今日又黎整雞，突然好鬼想食豉油雞，但最近臨近清明節，開始多人去掃墓拜山，去燒味店居然冇晒豉油雞，我頂...唔係掛，咁咪冇得食，但我今日真係好想食雞呀~~~

不過唔駛怕，燒味店隔離就係雞檔，去買半隻新鮮雞自己整豉油雞，不過我入廚房咁耐都未曾自己動手整豉油雞，但我相信應該唔會好難，下午的時候就係廚房攪掂隻雞，其實整豉油雞真係唔太難，話咁快就完成，但當見到隻豉油雞的時候，袁太又係度諗 : 難得自己整雞，咁不如去盡D整埋燻雞，何況屋企有茶葉，不過係香片茶葉，我諗味道都應該唔差，但係屋企整燻雞真係好鬼大煙

唔駛幾分鐘成間屋都俾煙所困，最攪笑莫過於袁生，因袁生當時係房內訓覺，訓醒行去廳見咁大煙，即刻衝入廚房問我發生咩事，我話冇事，只不過係度燻緊隻雞，袁生就話我煮野越來越新穎，遲早成間屋都俾我燒埋，唉 ... 為左俾佢定驚兼補鑊，就留番隻大雞脾俾佢開心下喇 !




茶葉煙燻豉油雞
材料(豉油雞) : 新鮮雞<半隻>，生抽<1杯>，老抽<半杯>，蔥，薑<適量>，片糖<1片>，八角<1粒>，乾蔥頭<3粒>，水<加至蓋過雞>


做法 :
1. 將雞洗淨抹乾水份

2. 爆香乾蔥頭，薑，蔥，八角，加入生抽，老抽，水，煮滾後加入片糖

3. 將雞放入煮20分鐘，煮的過程期間反動隻雞，蓋上蓋熄火，唔好開蓋等隻雞焗至熟透

4. 熟透後將隻雞放涼備用

********************************************************************************


材料(煙燻) : 白米<半杯(不用洗)>，香片茶葉，砂糖<5湯匙>，錫紙<2張>

 
做法 : 
1. 將錫紙放入鑊中，香片茶葉，白米及砂糖拌勻後舖在錫紙上

2. 蓋上鑊蓋開大火至出煙，放上蒸架，將豉油雞放上蓋上鑊蓋，用大火燻8分鐘

3. 取出雞待散熱，待涼後斬件即可