破戒了 <附漢堡扒食譜>

前幾日睇電視講開漢堡扒，真係好鬼死吸引，但整漢堡扒就一定係牛肉+豬肉，我而家仲未食得牛喎，咁點算呢 ??? 

但我又真係好想食，所以就寧願破戒都要食，不過我當然冇同袁生講喇，如果同佢講一定唔俾我整，一於整好先算，希望食完之後條腰唔痛，一般漢堡扒都會選擇配薯菜，但我係一個比較喜愛米飯的人，所以就選擇漢堡扒配白飯，其實整漢堡扒係非常之咁簡單，而且仲好好味，初時諗住整紅酒汁拌漢堡扒，但因為袁生而家唔可以飲紅酒的關係，咁唯有打消念頭，用番普通汁料，另外仲有西蘭花，炸生蠔做配菜，真係好滿足又夠飽

不過真係唔食好過食，食完後個晚條腰真係痛左唔少，又俾袁生鬧，話明知唔食得牛肉仲要整，但我真係好掛住牛肉的味道，知喇 ... 怕怕喇，下次真係唔敢破戒 !

漢堡扒 
材料(漢堡扒) : 免治牛肉<$180g>，免治豬肉<80g>，洋蔥<半個>，麵包糠<20g>，雞蛋<1隻>，牛奶<40ml>
醬汁 : 白蘑菇<5粒(切片)>，蘋果<半個(磨蓉)>，水<適量>，茄汁，o急汁<2湯匙>

 
做法 : 
1. 洋蔥切碎後用慢火炒至金黃色盛起，將牛奶同麵包糠拌勻備用

2. 牛肉豬肉加少許鹽拌勻，再將其餘材料加入，加少許黑胡椒拌勻

3. 用手將所有材料混合，分成四等份，放在手上來回拍打，輕輕拍成圓形

 

 

4. 燒紅鑊，用中火將漢堡扒煎至兩面金黃色，加少計水加蓋焗5分鐘，盛起漢堡扒

5. 鑊子不用洗，直接炒白蘑菇，待熟透後加入其餘醬汁同煮至杰身，淋在漢堡扒上即可