又係沙律... <附西瓜皮鹹魚鮮蝦沙律食譜>

天氣悶熱，晚餐繼續沙律為主，不過今次的沙律唔係凍冰冰，而係暖笠笠

其實呢個沙律印象中係睇電視學，其實初時都冇諗過會整，因為覺得配搭總是怪怪的，不過呢幾日真係冇咩胃口，熱到個腦都塞晒，諗唔到究竟煮咩晚餐好，所以就決定整呢個沙律試下，但唔知袁生啱唔啱胃口呢 ???

另外見袁生日日屋企都熱到抽筋兼出晒汗，又知袁生喜愛雞尾酒，所以就決定奉獻我的第一次，就係自己調製雞尾酒，好簡單用橙，紅莓同伏特加做材料，就有一杯味道甜甜地又有酒味的一杯雞尾酒了，味道袁生都不知幾喜歡

另外個西瓜沙律方面，大家唔好以為材料配搭古怪就覺得唔好味，但其實味道都唔錯架，酸酸甜甜咁，夏天食都幾開胃，不過最估唔到西瓜的甜味同鹹魚的味道都可以夾得到，可以中和大家的味道 !

沙律汁方面需要用到椰糖，大家可以去東南亞材料店買

 


西瓜皮鹹魚鮮蝦沙律
材料(西瓜皮鹹魚鮮蝦沙律) : 西瓜<1/4個>，柚子肉<適量>，鹹魚(馬友)<$15>，基圍蝦<10隻>，蝦米<適量>
沙律汁 : 青檸汁<2個>，砂糖，椰糖，魚露<1茶匙>


做法 :
1. 西瓜起肉切粒備用，西瓜皮切去綠色外皮後切成絲，加少許鹽拌勻，靜置30分鐘讓西瓜皮出水

2. 鹹魚撕成粒狀，放入焗爐用220度焗10分鐘至香脆備用

3. 蝦米浸水至軟，切成粒狀放入油鑊中炸至乾身，脆身盛起備用

4. 燒滾水將基圍蝦灼熟，盛起浸在冰水內去殻，將沙律汁拌勻至完全溶解

5. 將西瓜皮絲用手揸乾水份放入碟內，加入柚子肉，西瓜粒，沙律汁用手撈勻，再加入蝦肉撈勻

6. 最後在沙律上灑上脆鹹魚粒，炸蝦米粒即可