臘腸粒冬瓜炆鯪魚餅

夏天最好就係食冬瓜!
冬瓜湯就成日煲,咁今次不如用冬瓜黎做餸喇!
用冬瓜煮野離不開就係煮鯪魚肉,
簡單方便又好味!
不過我就另外再加少少臘腸碎,
因為我覺得用臘腸煮好似會香好多,
而老公的評語係,
食就幾好食,不過唔加臘腸粒會好d喎!
可能老公唔鐘意食臘腸的關係,
所以先咁講掛!



~臘腸粒冬瓜炆鯪魚餅~食譜

材料 : 冬瓜-1斤 / 鯪魚肉-$10 / 臘腸-1條 / 雞湯-1盒

                      醃料 : 生粉 , 糖 , 生抽 , 胡椒粉 , 麻油 - 少許
                      獻汁 : 生粉 , 生抽 , 糖 , 麻油 , 水 - 少許                       
 

 

1.鯪魚肉加入醃料醃約30分鐘.
2.冬瓜去皮切件,臘腸切粒備用.
3.燒紅鑊,將冬瓜落鑊炒香,加少許雞湯,水,蓋上鑊蓋用中火煮到冬瓜軟身後,撈起.
 
4.將臘腸粒落鑊炒香後撈起,用匙羹將鯪魚肉放入鑊中,用慢火煎至微黃後,反轉鯪魚肉,用鑊鏟輕輕壓成餅形至兩面
   煎至金黃色.
5.冬瓜落鑊與鯪魚餅一起兜勻,再注入獻汁煮滾,上碟後再放上臘腸粒,即可.