滷水雞蛋豆腐

某日我家袁生話好熱 , 冇咩胃口想食白粥 , 我當然唔會say no , 煲個靚白粥佢嘆 , 之不過袁太又點會只係煲白粥俾袁生呢 , 一於整個滷水俾佢配白粥 , 其實點解我會整滷水 , 好簡單 , 皆因袁生喜愛 ......



大家亦唔好以為袁太只會整滷水雞翼 , 其實滷水可以好多選擇 , 咩都可以放入滷水汁內 , 曾經滷過牛展 , 豬腩肉 , 雞腎 , 雞腳 , 鴨舌等等 ... 不過今次就選擇簡單的滷豆腐同雞蛋 , 平時袁太好鐘意食滷豆腐 , 雖然街有好多滷水店可以買 , 價錢又唔貴 , 但感覺街買的滷豆腐 , 買回家後會好快變味 , 所以最好當然自己滷



滷豆腐我會選擇用~普寧豆腐~ , 係街市的豆腐店買 , 4蚊/磚

 

而每次整滷水 , 雞蛋一定唔少得 , 因為袁太超喜愛食滷水蛋 , 再去雜貨店買埋滷水料就可回家開工 , 本來整五隻滷水蛋 , 但當烚雞蛋時俾袁生偷食左兩隻 , 咁就自然滷三隻 , 點知袁生又話得三隻滷蛋咁少 , 攪到袁太拿拿臨又要加番兩隻雞蛋再滷 , 其實整滷水唔需要好長時間 , 不過就會浸幾粒鐘 , 等佢入味先食得 , 當日袁太都浸左成個鐘先俾袁生配白粥 , 完完全全入晒味 , 好正呢 ^^



材料 : 滷水料 , 薑(預先去皮切絲) , 普寧豆腐 , 雞蛋 , 冰糖 , 香葉 , 酒 , 水

香葉 , 滷水料放入煲內 , 加入薑絲 , 冰糖 , 鹽 , 調味料及2000ml水拌勻 , 用中火煮至微滾及冰糖溶掉後 , 蓋上蓋轉慢火煮30分鐘

期間將雞蛋放入煲內加水 , 用中火煮15分鐘至熟透 , 用水沖洗至涼 , 將雞蛋去殼 , 普寧豆腐用水沖一沖洗抹乾水份 , 放入油鑊內用慢火慢慢炸至一面金黃色 , 反轉另一面同樣用慢火慢慢炸至金黃色 , 盛起備用

將炸好的豆腐同雞蛋放入滷水汁內 , 蓋上蓋用慢火煮15分鐘 , 盛起豆腐及雞蛋放入另一煲內 , 淋上滷水料至滿 , 蓋上蓋最少焗1小時(期間久唔久就反轉另一面繼續浸 , 袁太個日足足浸左6小時先食 , 入晒味呢)

材料
滷水料1包 , 薑(預先去皮切絲) , 普寧豆腐2磚 , 雞蛋5隻 , 冰糖 , 香葉 , 酒 , 水2000ml

調味料
生抽5湯匙 , 老抽3湯匙 , 紹興酒1湯匙 



做法
1. 香葉 , 滷水料放入煲內 , 加入薑絲 , 冰糖 , 鹽 , 調味料及2000ml水拌勻 

2. 用中火煮至微滾及冰糖溶掉後 , 蓋上蓋轉慢火煮30分鐘

3. 期間將雞蛋放入煲內加水 , 用中火煮15分鐘至熟透 

4. 用水沖洗至涼 , 將雞蛋去殼 

5. 普寧豆腐用水沖一沖洗抹乾水份 

6. 放入油鑊內用慢火慢慢炸至一面金黃色 , 反轉另一面同樣用慢火慢慢炸至金黃色

7. 盛起備用

8. 將炸好的豆腐同雞蛋放入滷水汁內 , 蓋上蓋用慢火煮15分鐘 

9. 盛起豆腐及雞蛋放入另一煲內 

10. 淋上滷水料至滿 , 蓋上蓋最少焗1小時即可

     (期間久唔久就反轉另一面繼續浸 , 袁太個日足足浸左6小時先食 , 入晒味呢) 




自己調製的滷水汁絕對俾起街買的現成滷水汁還要好味得多呢 ^^