鹹魚雞粒炒飯

有時真係唔知點解冰箱經常發現有雞扒的蹤影 , 又醒唔起係幾時買 , 真係要想辦法清清佢 , 本應想簡單切件醃一醃再乾煎做餸 , 但又發現百寶箱仲有冷飯剩 , 另外前兩日係屋企同袁生打爐的時候又剩低少少生菜 , 有冷飯 , 有生菜 , 又有雞扒 , 最啱就用來炒飯 , 就炒我同袁生都愛吃的鹹魚雞粒炒飯 , 不過而家的雞粒炒飯冇我份 ......



其實一年四季我都鐘意炒飯食 , 最愛炒飯可以變化多端 , 用簡單的材料炒埋一碟就食得 , 當夏天炒飯的時候 , 可以縮短係廚房煮到出晒汗的時間 , 當冬天寒冷炒飯的時候 , 亦可以縮短係廚房打晒冷震的時間 , ~哈~ 所以炒飯真係好鬼方便 , 何況炒飯夠飽肚 , 食兩碗仔已經好足夠 , 唔錯架



不過講開炒飯 , 我地兩個除左喜愛食鹹魚雞粒炒飯外 , 仲鐘意食肉丁腸仔粒炒飯 , 三文魚粒雜豆炒飯咁呢 , 而每次見到雞皮都會雙眼發光的我 , 用雞扒炒飯 , 而雞皮當然唔會掉左佢咁浪費 , 將雞皮連同蒜頭放入鑊中煎至出油 , 就變成香噴噴的蒜香雞油 , 用蒜香雞油來炒飯 , 每粒飯吸收晒雞油的香味 , 好鬼香 , 仲有鹹魚同雞粒做配料 , 真係超級無敵咁好味 , 不過大家有冇覺得呢個炒飯比較半濕乾的狀態 ???

 

大家唔好誤會呀 ~~ 唔係袁太炒得唔好呀 , 係我同袁生都比較鐘意濕濕地的炒飯 , 唔太喜愛出面餐廳炒到乾過我荷包個種感覺同口感呢 ^^

 

材料 : 冷飯 , 鹹魚(梅香) , 雞扒 , 雞蛋 , 蔥 , 唐生菜 , 薑 , 蒜頭 , 酒 , 鹽 , 糖 , 生粉 , 胡椒粉 , 雞粉

雞扒去皮後切粒(雞皮留用) , 放入大碗內加入雞粉及醃料拌勻靜待30分鐘 , 唐生菜切絲後用水沖一沖洗及瀝乾 , 鹹魚去骨切粒 , 薑去皮切細粒 , 蔥切粒 , 蒜頭去衣拍扁 , 雞蛋打成蛋液備用

鑊中加入蒜頭及雞皮爆香 , 用慢火慢慢煎出雞油 , 雞皮脆身及蒜頭微黃色成蒜香雞油 , 將雞皮盛起去掉 , 加入薑粒拌勻爆香 , 加入冷飯及少許鹽調味拌勻炒散  , 加入一半蛋液拌勻至每粒飯都沾上蛋液 , 用中火將飯炒至乾身及微黃色後盛起 , 餘下一半份量蛋液放入鑊中炒成蛋粒 , 盛起

鑊中加入鹹魚粒爆至有香味盛起 , 放入雞粒及酒炒至轉色 , 將炒飯回鑊 , 加入胡椒粉調味及生菜絲拌勻炒數分鐘 , 最後熄火將鹹魚粒及蛋粒回鑊 , 加入蔥粒及少許麻油拌勻即可

材料
冷飯2碗 , 鹹魚(梅香)2片 , 雞扒1塊 , 雞蛋2隻 , 蔥 , 唐生菜1棵 , 薑 , 蒜頭1個 , 酒 , 鹽 , 糖 , 生粉 , 胡椒粉 , 雞粉

醃料
蠔油 , 生抽 , 鹽 , 糖 , 生粉 , 麻油 , 酒



做法
1. 雞扒去皮後切粒(雞皮留用) , 放入大碗內加入雞粉及醃料拌勻靜待30分鐘 

2. 唐生菜切絲後用水沖一沖洗及瀝乾 

3. 鹹魚去骨切粒 , 薑去皮切細粒 , 蔥切粒 , 蒜頭去衣拍扁 

4. 雞蛋打成蛋液備用

5. 鑊中加入蒜頭及雞皮爆香 

6. 用慢火慢慢煎出雞油 , 雞皮脆身及蒜頭微黃色成蒜香雞油 , 將雞皮盛起去掉

7. 加入薑粒拌勻爆香

8. 加入冷飯及少許鹽調味拌勻炒散  

9. 加入一半蛋液拌勻至每粒飯都沾上蛋液 , 用中火將飯炒至乾身及微黃色後盛起 

10. 餘下一半份量蛋液放入鑊中炒成蛋粒 , 盛起

11. 鑊中加入鹹魚粒爆至有香味盛起 

12. 放入雞粒及酒炒至轉色 , 將炒飯回鑊 , 加入胡椒粉調味及生菜絲拌勻炒數分鐘 

13. 最後熄火將鹹魚粒及蛋粒回鑊 , 加入蔥粒及少許麻油拌勻即可 




香噴噴的鹹魚雞粒炒飯 , 真係會忍唔住口不停食 , 不過可惜而家唔食得雞 , 唯有只可以望住袁生食 , 用剩的生菜留待明天打爐呢 ^^