蠔仔肉碎煎豆腐

今日又黎整袁生最鐘意食的海鮮類,
就係蠔仔喇!
真係唔知點解袁生好鐘意食用蠔仔煮的餸,
無論蠔仔又好,大隻的蠔都好,
都一樣咁鐘意食,
但反而自助餐有得食個d蠔,
袁生就唔太鐘意,
但袁太就反而鐘意食自助餐個d,
都唔知袁生係傻傻地定係怪怪地...哈...哈...
不過有時袁太發覺同袁生的口味,真係好唔同,
但點解我地會拍拖兼結婚的呢
我知喇!
因為袁太平時會咩都就晒袁生,
盡量煮袁生鐘意食的野,
未結婚前係一個好女友,
結婚後係一個好老婆,
有時覺得袁生娶到袁太真係好過中六合彩,
大家睇到呢段文章的時候係咪好想嘔呢?
大家唔好咁喇!
大家可以當袁太係自戀狂或者自信心過高就得架喇!

好喇!都係唔好講d無聊野,
講番今日整咩俾袁生食先喇!
就係蠔仔肉碎煎豆腐,
其實個整法同肉碎炒蠔仔係一樣,
唯一有少少唔同的就係加埋袁太鐘意的豆腐,
豆腐煎到金金黃黃,真係好味道!
不過袁生始終都係唔多鐘意豆腐,
只食左一舊豆腐咋!



~蠔仔肉碎煎豆腐~食譜

材料 : 蠔仔-半斤 / 豬肉碎-$10 / 布包豆腐-1磚 /  蔥-少許 / 薑-5片

                      醃料 : 生抽 , 生粉 , 糖 , 麻油 , 水 - 少許                      
 

 

1.生蠔用麵粉過水洗三次,瀝乾水,備用.
 
2.豬肉碎加入醃料醃30分鐘.
3.燒滾水,下少許紹酒,生蠔拖一拖水,撈起,瀝乾.
 
4.豆腐切片後,落鑊煎至兩面金黃色,撈起.
5.燒紅鑊,下薑絲,蔥段炒香後,加入豬肉碎,生蠔兜勻後將豆腐回鑊.
6.再加入少許蠔油,雞粉調味,即可.