炆火腩係街就食得多,
自己入廚咁耐好似一次都未煮過喎!
咁今晚一定要煮下喇!
同埋夏天唔煮冬瓜點得架!
不過我記得做女的時候,婆婆同媽咪就成日煮!
仲好好食添!
而平時袁生就鐘意食肉同埋豆卜,
咁呢個餸就啱晒佢喇!又有豆卜,又有火腩!
而火腩梗係買d半肥瘦的就最好食喇!
一層肥,一層瘦絕對啱晒袁太胃口,
不過袁太最鐘意食火腩的皮,脆脆地,好味道!
但呢個餸係炆的,所以d火腩連皮都會炆到腍晒!
袁太就唔係咁鐘意喇!
而袁太又確保驚袁生話冇咩味道,
所以就加左粒鮮雞濃湯寶一齊炆,冬瓜吸晒d味,好香!
袁生對呢個餸都好鐘意,仲話好好味添!
~冬瓜豆卜炆火腩~食譜
1.冬瓜去皮切厚件,備用.
2.燒滾水,下豆卜煮約6分鐘,撈起搾乾水後切半.
3.燒紅鑊,爆香薑片,火腩後,下冬瓜略炒,加水,鮮雞濃湯寶(水要蓋過冬瓜面),滾後轉慢火炆約10分鐘,視乎
冬瓜厚度,炆冬瓜至透明色.
4.將豆卜回鑊兜勻,加少許蠔油調味,再炆約5分鐘,即可.
沒有留言:
張貼留言