川貝雪梨栗子排骨湯

今日係街市生果檔見到有雪梨賣,
一份$10
都有5個咁多,一於今晚用黎煲湯喇!
但係今次唔想加埋蘋果一齊煲,
咁可以用咩煲呢
其實雪梨除左同蘋果一齊煲外,
用川貝都係一個唔錯的選擇黎架!
之前用栗子煲湯用剩半包,咁就加埋落去一齊煲!
但今次用咩肉煲好呢
又唔想用瘦肉,咁不如用排骨煲喇!
袁太覺得用排骨煲完湯出黎,d排骨好腍,好好味架!
不過唔知用川貝煲湯,袁生鐘唔鐘意呢?
因為川貝本身有少少苦!



~川貝雪梨栗子排骨湯~食譜

材料 : 川貝-$20 / 雪梨-3個 / 栗子-12粒 / 紅蘿蔔-1條 / 排骨-$20 / 蜜棗-2粒 / 南北行-少許 /
                               無花果-1粒 / 果皮-1小塊

做法:
1.排骨飛水,無花果用水浸軟.

2.果皮浸水後刮去瓤,備用.
3.川貝浸水,雪梨去皮去芯後切件,用水浸住,紅蘿蔔去皮切件.
 
4.煲內放入適量的水,凍水落蜜棗,南北行.

5.待滾後,加入栗子,排骨,無花果用大火煲30分鐘.
6.再加入川貝,紅蘿蔔,雪梨,果皮用大火煲30分鐘後,轉慢火煲1小時,下少許鹽調味,即可
.

功效:川貝-有清熱潤肺,止咳化痰的功效. 
                    雪梨-有清熱降火,潤肺去燥功效.  無花果-對喉痛好有功效.