芋頭椰汁西米露

呢幾日天氣都咁鬼凍,
所以袁太都煲多左糖水,
不過由於袁生袁太太唔夾喇,
所以要煲一款糖水要大家都食的話,
真係有些少難度架,
因為袁太鐘意食的紅豆沙,用南瓜煮的糖水,紫米露,芝麻糊,
袁生唔鐘意食,
而袁生鐘意食的綠豆沙,喳咋,
袁太又唔鐘意食,
所以我地兩個都幾煩架!
經過袁太絞盡腦汁之後,
終於諗到一款糖水袁生袁太都食架喇,
就係芋頭椰汁西米露!



不過其實袁生以前都唔係咁好芋頭架,
係上年的時候,
無端端唔知發生咩事,
開始冇咁抗拒呢樣野,
袁太梗係襯袁生仲食芋頭的時候,
煲番個糖水俾佢食下喇,
如果唔係到時又唔鐘意的話,
袁太又唔可以煲架喇,
不過其實我覺得兩個人的份量都幾難控制,
有時一煲就煲左好多都食唔晒,
因為食一碗已經飽飽,
不過係咁凍的天氣食番碗糖水,
真係成個人都暖晒!



~芋頭椰汁西米露~食譜

材料 : 芋頭-半個 / 椰汁(165ml)-1罐 / 西米-60g / 鮮奶 , 冰糖 , 水 - 適量

1.燒滾水,下西米煮約5分鐘後,蓋上煲蓋焗約10分鐘或至西米變透明.
 
2.隔去水份,用水沖洗至涼透,瀝乾水份備用.
3.芋頭去皮切細粒備用.
 
4.燒滾水,下芋頭用大火煮約5-8分鐘後,蓋上煲蓋焗約15分鐘至腍身.
 
5.再開火番煲芋頭,下少許冰糖調味.
6.再加入椰汁,鮮奶,西米煮滾即可.


西米同芋頭所煮的時候都唔同,所以一定要分開煮,才可確保芋頭夠腍.