煎蝦餅

袁生好鐘意食呢個煎蝦餅架,

袁太記得好幾年前,

係書局睇免費書的時候,

袁太每次去親書局都淨係會睇食譜書架咋,

無意中見到本書介紹呢個煎蝦餅,

心諗袁生咁鐘意食海鮮,

應該幾啱袁生食,

於是就去街市買材料喇,

其實整呢個蝦餅都幾簡單架,

只要將材料撈勻就ok喇,

不過最估唔到就係以前第一次整俾袁生食,

袁生已經好鐘意喇,
其實都唔知點解佢會咁鐘意食,

相反袁太就覺得麻麻地,

不過袁太見好耐冇整過,

其實係因為袁太諗唔到煮咩姐,

不過冇所謂喇!

只要袁生鐘意,袁太就會去整!

~煎蝦餅~食譜

材料 : 蝦仁-10-12隻 / 豬肉-(紋碎$10) / 蛋白-1隻

 
1.將蝦仁去腸,洗淨,拍成蝦膠.
 
2.用碗將蝦膠,豬肉拌勻.
3.拌勻後再加入蛋白,生粉,少許胡椒粉,生抽,蔥花.
4.燒紅鑊,煎至兩面金黃色,即可.