蕃茄薯仔三文魚骨湯

本來係煲三文魚頭湯架,點知...

諗住去吉吉島買靚三文魚頭煲湯
點知去到得番一個
心諗咁好彩
大家睇下個三文魚頭幾靚

點知當袁太想攞之際
突然有個呀"嬋"一手搶左

最後一個俾佢攞埋,咁我煲咩呀?

唯有落街市睇下有冇喇
平時唔煲就見,今日想煲就成個街市都冇
唔係咁黑仔呀
唉...算喇
既然冇三文魚頭,就用三文魚骨煲
味道應該唔會太大分別
不過其實我一次都未煮過三文魚湯
因為驚煮出黎會好腥
但原來一d都唔腥架,仲好好飲
連袁生咁麻的人都話OK!

~蕃茄薯仔三文魚骨湯~



材料:
三文魚骨-1包/蕃茄-2個/薯仔-1個/薑-3片

做法:

<1>
三文魚骨洗淨抹乾,蕃茄洗淨切件,薯仔去皮切件備用.

<2>燒紅鑊,爆香薑片後下三文魚骨煎至兩面金黃色.

<3>
然後加入適量滾水,用大火煮至滾後加入蕃茄,薯仔,轉慢火煲約45分鐘..

<4>
下少許鹽,胡椒粉調味即可.