斑球牛肉魚湯米線

之前係吉吉島買左包急凍石斑肉都未整,所以...

最近天氣咁反常,唔係凍就潮濕到死
真係攪到個人都冇晒胃口
何況袁生話唔想食飯,不如煮米線喎
OK,你叫到我又點可以SAY NO呢
但煮咩米線好???
袁生提議不如煮魚湯米線,都好喎
以前袁太會用濃湯寶幫手
但今次決定買條紅衫魚自己整魚湯底
而材料方面一定要有肥牛
因為袁太鍾意食
另外發現冰箱原來仲有包石斑肉
先記起之前特價買左番屋企都仲未煮
再加少少生菜
話咁快就有一碗熱辣辣又好味的米線!

~斑球牛肉魚湯米線~




材料:

急凍石斑肉-2塊/肥牛肉-6塊/紅衫魚-2條/薑-3片/米線-1斤/生菜-1棵



做法:

<1>

煲滾水,落少許鹽將米線煮腍再過冷河,瀝乾水備用.



<2>

燒紅鑊,爆香薑片後將紅衫魚落鑊煎至兩面金黃色,然後加水煮成湯.



<3>

生菜洗淨,牛肉解凍後切半,石斑肉切件後加少許鹽,麻油醃好.



<4>

當魚湯煮至奶白色後,加入米線煮滾,再加入其餘材料(生菜,肥牛肉,石斑肉).



<5>

待所有材料煮熟,煮滾後即可.