手撕雞蝦餅煮白蘿蔔 <附食譜>

由於最近工作關係，幾乎好多日冇煮飯喇，餐餐都食外賣，真係好鬼厭，所以袁太決定就算幾夜收工都好，都要番屋企煮餐飯食下，而買餸方面，梗係由袁生負責喇，而家袁生買餸已經好叻，最近天氣熱，多數都係煮冬瓜或節瓜，但袁生話想食白蘿蔔

白蘿蔔???

都唔錯，但我又唔想用黎煮湯，突然想起，袁生平時超鐘意食蝦餅，咁如果煎個脆口蝦餅，再加同雞湯煮的白蘿蔔片，唔知味道夾唔夾到呢 ???

不過呢個蝦餅白蘿蔔都煮左幾耐，淨係煮個蘿蔔都用左30分鐘，好彩平時我地都係夜食飯的人，如果唔係實餓死，呢個蝦餅另外加左雞絲一齊煎，真係好好味，另外白蘿蔔又甜，兩煮夾埋真係冇得頂 !



手撕雞蝦餅煮白蘿蔔
材料 : 雞扒(細)<1塊>，蝦膠<$25>，雞蛋<1隻>，白蘿蔔<1條>，雞湯(1L)<1盒>
醃料 : 生抽，老抽，生粉，麻油<少許>


做法 :
1. 雞扒解凍洗淨後加入醃料醃30分鐘，白蘿蔔去皮切片

2. 燒滾水，將雞扒隔水蒸30分鐘至熟透，取出待涼後去皮將雞肉撕成絲備用

3. 蝦膠加入少許雞粉，胡椒粉拌勻

4. 將手撕雞肉，雞蛋加入蝦膠內拌勻備用

5. 鑊中加入雞湯，待滾後加入白蘿蔔片用慢火煮30分鐘，將雞湯白蘿蔔上碟備用

6. 燒紅鑊，將做法<4>的蝦膠材料放入鑊中煎至兩面金黃色，盛起放在白蘿蔔上即可