泰式綠咖哩雞柳 <附食譜>

袁生突然話想食綠咖哩做晚餐，做老婆的的點可以say no，不過心諗"咁熱天氣仲食咖哩，都傻傻地架"，不過聽講綠咖哩好辣個喎，會唔會辣到個嘴變孖潤腸呢 ???

袁太本來想買新鮮雞整咖哩，點知見到冰箱有塊雞扒，所以都係用雞扒整算，應該唔會太大分別，呢個綠咖哩除左雞柳外，仲有好多配料架，例如 : 椰菜花，芽菜，芹菜等等 ...

簡直超簡單，話咁快就煮好，袁太專登整多d汁俾袁生撈飯，點知袁生一食第一啖就講"好辣呀"，唉 ... 我都話左綠咖哩辣架喇，講你又唔信，係咪辣到噴火呢，不過唔好話袁生覺得辣，就連袁太食得辣的人都覺得好辣，辣到個嘴個麻晒，不過味道除左辣之外，都幾好味架 !

泰式綠咖哩雞柳
材料 : 雞扒<1塊>，椰菜花<1個>，洋蔥<半個>，銀芽<$2>，芹菜<$3>，青 瓜<1條>，蒜頭(切碎)<適量>，紅辣椒<1條>，綠咖哩醬<適量>，椰漿<半包>


做法:
1. 雞扒去皮切件，洋蔥去衣切件，椰菜花洗淨切件，青瓜，芹菜洗淨，紅辣椒切條

2. 雞肉加入少許油，鹽，魚露，生粉，水，糖醃30分鐘

3. 燒紅鑊，爆香洋蔥，蒜頭後加入雞肉炒至轉色

4. 再將其餘配料(椰菜花，芽菜，芹菜，紅椒絲)落鑊一同拌勻

5. 加入適量綠咖哩醬拌勻後，再加入適量水，用中火煮約10分鐘

6. 最後加入椰漿煮片刻，再加少許鹽調味即可