冰皮月餅 <附免煮冰皮粉,特級冰皮粉兩款食譜>，<另有狗狗月餅食譜>

又快到中秋節，過往中秋節都係出去買月餅食，今年就第一次操刀自己自製冰皮月餅，其實初初冇諗過自己整，事緣係某一日去寵物店訂月餅俾BB，點知到應該攞貨的日子都仲未打黎，都唔知有冇攪錯，不過好彩訂個時未俾錢

就係因為咁既原因，所以就決定自家製，其實最主要都係整俾BB食，到假期的時候，就同袁生去二德惠買材料，嘩...個日真係好鬼死多人，原來真係好多人自己買材料整月餅，去到

見到有兩款冰皮粉，都唔知應該買邊隻，袁生就提議每款買一包試下，另外仲要買埋其他材料，例如月餅模，餡料等等 ...

袁生就選擇左綠茶餡，我就例牌蛋黃綠豆蓉，仲有BB個份，餡料就選擇左紫心蕃薯加南瓜，
星期六夜晚食完飯就開始整，整的時間都唔係太長，不過整完都要放係冰箱雪一晚先可以 !

冰皮月餅
材料(特級冰皮粉) : 特級冰皮粉<1包>，熱水<200g>，砂糖<100g>，餡料(綠菜，綠豆蓉，蛋黃)<適量>，太白粉<適量>
材料(免煮冰皮粉) : 免煮冰皮粉<1包>，冷開水<250ml>，固體菜油<75g>，餡料(綠菜，綠豆蓉，蛋黃)<適量>
狗狗餡料(紫心蕃薯，南瓜)<適量>，太白粉<適量>



做法(特級冰皮粉) :
1. 將整包粉與砂糖拌勻

2. 加入熱水快手攪成粉糰，用大火隔水蒸25分鐘至半透明

3. 蒸好後快手攪至粉糰成奶白色

4. 將餡料分別搓成圓形備用(如蛋黃綠豆蓉，蛋黃放入焗爐用150C焗5-8分鐘後取出壓成茸，同綠豆蓉一同搓勻即可)

5. 將粉糰分割，枱面同月餅模均灑上少許太白粉，將已包入餡料的粉糰放入月餅模內，放在枱面壓成形

6. 用毛掃輕輕掃走多餘的太白粉，放入月餅盒加蓋，放入冰箱冷藏保存

做法(免煮冰皮月餅) :
1. 將冷開水加入整包冰皮粉中，快手攪勻，成為粉糰

 

 

2. 用手將固體菜油分3分加入炒糰中再搓勻  

 

3. 將餡料分別搓成圓形備用

4. 將粉糰分割，枱面同月餅模均灑上少許太白粉，將已包入餡料的粉糰放入月餅模內，放在枱面壓成形

5. 用毛掃輕輕掃走多餘的太白粉，放入月餅盒加蓋，放入冰箱冷藏保存

做法(狗狗月餅) :
1. 將之前做法<4>已分割的粉糰留起幾份備用

2. 紫心蕃薯放入熱水中用大火煮10分鐘，盛起特涼壓成茸

3. 南瓜去皮去籽後切件，隔水蒸10分鐘後壓成茸

4. 將蕃薯茸包上南瓜茸後搓成圓形成餡料

5. 枱面同月餅模均灑上少許太白粉，將已包入餡料的粉糰放入月餅模內，放在枱面壓成形

6. 用毛掃輕輕掃走多餘的太白粉，放入月餅盒加蓋，放入冰箱冷藏保存