日式咖哩炆牛展 <附食譜>

唔知點解突然好想食咖哩，但又唔想食港式咖哩，所以就去左吉吉島睇下有咩日式咖哩賣，以前的我就一定會買一包包的現成咖哩，即係隔水煮番熱就食得個款呢，都係個句~方便~，
不過味道唔太好味，所以今次就決定自己買咖哩磚，嘩 ... 不過原來咖哩磚都有好多款

袁太企左係度差唔多有5分鐘的時間，終於決定買邊隻咖哩磚，買好咖哩磚後，就要決定買咩材料一齊炆，初初諗住買牛肋條架，但記得袁生好似話過唔太鐘意食牛肋條，咁又要行番去街市買牛展，但唔知用牛展炆，完成後會唔會好硬呢 ???

另外煮咖哩點少得其他配料呢，就係紅蘿蔔，薯仔，洋蔥

仲有袁太上網見到有其他blog友煮日式咖哩的時候會加埋蘋果落去，咁啱屋企有蘋果，雖然唔知有咩作用，但人加我又加，一定冇走雞

~炆呀~炆呀~炆左1個鐘，一碟香噴噴的咖哩有得食，雖然炆左好耐，但d牛展依然好軟身，一d都唔硬，反而d蘋果又幾好味，熱熱地，又有咖哩味，連我同袁生平時唔鐘意食熱蘋果的人都覺得味道唔錯，總知一個字講晒"正" !



日式咖哩炆牛展
材料 : 牛展<1條>，日式咖哩磚<1包>，薯仔<1個>，甘旬<1條>，蘋果<1個>，洋蔥<1個>

做法:

1. 牛展切件，甘旬，薯仔去皮切粒，蘋果去皮切粒後浸水備用

2. 燒滾水，將牛展出水約5分鐘盛起

3. 燒紅鑊，爆香洋蔥及甘旬粒，加入牛展炒勻，再加水(水的份量要蓋過材料)，滾後轉慢火煮45分鐘

 

4. 加入日式咖哩磚，薯仔粒，蘋果粒拌勻

5. 滾起後用慢火煮30分鐘即可