~Sukiyaki壽喜燒~ <附食譜>

袁太最近去街市買餸，見到大部份人都買火鍋材料，可能天氣開始涼的關係，其實袁太都好想打邊爐架，不過如果打邊爐的話，又驚袁生會腳痛，所以都係暫時停一停，諗一諗，不過每逢秋涼的時候，究竟除左打邊爐，仲有食咩可以暖下胃呢 ???


答案就係 : Sukiyaki壽喜燒

大家係咪好好奇點解袁太會整壽喜燒，事緣係平時J2台有小丸子睇，由於要番工的關係，袁太都會錄低佢慢慢睇，當夜晚睇番小丸子的時候，咁啱係講小丸子一家夜晚整壽喜燒，好似好正，所以袁太就想試下整，其實壽喜燒雖然都好似打邊爐咁，鐘意食咩就加咩材料，但起碼袁生食左應該唔會腳痛，袁太決定整Sukiyaki之後，就去吉吉島買材料

初時諗住自己調較Sukiyaki汁，點知發覺原來吉吉島有現成賣，袁太梗係買現成汁，因為平時比較少煮日式食物，如果又買日式醬油，味琳等等的調味料番屋企自己整汁料的話，用唔晒又好似好浪費，所以一支汁料，真係夠晒方便

初時仲驚夜晚淨係整Sukiyaki會唔夠食，但原來食食下都好飽 !

~Sukiyaki壽喜燒~
材料 : 吉吉島靚肥牛<1包>，白蘿蔔<半條>，豆腐<1磚>，本菇<1包>，脆皮芝士腸<8條>，獅子狗<3條>，皇帝菜<半扎>，大蒜<1條>，牛脂(吉吉島呀姐俾)<1舊>，Sukiyaki汁<半支>，雞蛋<1隻>

做法:
1. 白蘿蔔去皮切件，本菇洗淨去尾，獅子狗一開二斜切，其他材料洗淨備用

2. 燒紅Sukiyaki鍋，用牛脂起鑊後，加入大蒜炒一炒，再加入已切好的豆腐煎至兩面金黃色

3. 再加入肥牛炒至半熟盛起

4. 加入Sukiyaki汁及適量水(現成Sukiyaki汁比較鹹，可加少許糖調味，所以大家記得要試味)

5. 加入白蘿蔔煮至熟透後，再加入其餘材料(本菇，獅子狗，芝士腸，皇帝菜)煮熟

6. 最後加入肥牛，將Sukiyaki鍋放在電磁爐上煮至肥牛熟透即可(一邊滾一邊食，材料煮熟後可沾蛋汁一齊食)