什錦炒桂花魚肉 <附食譜>

最近又偷懶幾日冇uplaod blog，皆因呢幾日天氣又凍，放工又夜，腰又痛，頭又痛，令到我真係要早些上床休息，今日見個頭冇咁痛，第一時間要清一清食譜，講番今次個桂花魚先，星期日的時候，一條友落街市買餸，係街市行去好多個圈都唔知買咩餸好，因為袁生平時實在有太多野係唔鐘意食，係無靈感的情況下，又係買左袁生至愛的桂花魚做晚餐

而家去街市買餸真係貴到嘔電，咩都加價，連菜心一斤都要成廿十幾蚊，真係攞人命，係咩都加價的情況下，又唔見人工會加，有時覺得生活真係好艱難 !





什錦炒桂花魚肉 
材料 : 桂花魚<1條>，木耳<適量>，紅椒<1條>，冬菇<適量>，粟米芯<1包>，梅菜<1條>，蒜蓉<適量>

做法 :
1. 桂花魚叫魚檔幫忙起肉，將魚肉切厚件，加入雞粉，麻油，鹽醃15分鐘

2. 木耳，冬菇浸軟後切成絲，粟米花洗淨切半，紅椒斜切成條備用

3. 梅菜浸水30分鐘，榨乾水份切粒備用

4. 燒紅鑊(不落油)，將梅菜炒香，加入少許麻油拌勻盛起，鑊中落油將桂花魚肉略略爆香盛起

5. 爆香蒜蓉，加入木耳絲，冬菇絲，紅椒粒，粟米芯炒勻，待差不多熟透後，將梅菜，桂花魚肉一同兜勻即可