韓式泡菜五花腩肉拌生菜 <附自家製小辣泡菜食譜>

又偷懶左幾日冇開電腦，事緣因為平時放工夜，番到屋企食完飯都唔想郁，何況BB最近身體又唔多好，所以袁生袁太係屋企都會寸步不離BB的視線範圍之內，因為睇少佢一陣，BB就一定會攪攪震

好喇 ! 記得前幾日整左泡菜放係雪櫃，袁生以前好喜愛簡簡單單泡菜拌飯，但今日又話想用黎炒，當然冇問題喇，去街市買左條靚靚五花腩，一於整泡菜五花腩肉

其實簡簡單單泡菜腩肉 + 白飯已經流晒口水，但袁生又話天氣熱唔想食飯，咁唯有轉生菜包喇，其實拌生菜都好好味，何況自家製泡菜係屬於小辣程度，而且五花腩肥瘦均勻，真係好味道架，不過今次份量好似少左D，兩個人都唔係好夠食添 !

自家製泡菜(小辣版)

韓式泡菜五花腩肉拌生菜
材料(自家製泡菜) : 黃芽白<1棵>，甘旬<1條>，蘋果<1個>，蔥，薑，蒜頭，粗鹽<適量>
調味料 : 韓國辣椒粉<5湯匙>，砂糖<3湯匙>，魚露<適量>


做法 :
1. 將黃芽白整塊撕下來洗淨後不要切開或撕開，盡量保存菜本身的甜味

2. 清洗後隔去多餘水份，平均灑上粗海鹽後用碗壓住，將菜壓至軟身及出水(中途反轉3次)

3. 將多餘水份隔走備用

4. 甘旬洗淨去皮刨絲，蔥切小段，蘋果去皮與薑，蒜頭磨成泥狀，與調味料拌勻備用

5. 將每葉均勻地抹上醬料後放入保鮮盒內，封上保解紙後才加蓋，隔一天就可以食了

****************************************************************************************

材料(韓式泡菜五花腩肉拌生菜) : 自家製泡菜<150g>，五花腩<1條>，蒜蓉<適量>，唐生菜<1棵>


做法 :
1. 燒滾水放入五花腩煮20分鐘熄火不開蓋焗15分鐘

2. 取出清洗後用少許鹽醃1小時，然後將五花腩切薄片

3. 自家製泡菜切件，唐生菜洗淨處理好備用

4. 燒紅鑊，將五花腩片煎至兩面金黃色，加少許蒜蓉爆香

5. 再加入泡菜及2湯匙水拌勻煮至汁料收乾即可，食時可以生菜包住享用