黑糯米蓮子紅豆沙

最近天氣涼涼地 , 我都煲多左糖水暖暖胃 , 前排同奶奶傾電話講起黑糯米糖水 , 黑糯米其實我都好耐冇食過 , 令袁太心思思又想煲黑糯米 ......



去雜貨店買了一包黑糯米回家 , 不過黑糯米都好多煮法 , 究竟煲椰汁紫米露 ??? 黑糯米西米芋頭糖水還是怎樣好呢 ??? 我知袁生唔愛食芋頭 , 所以out左芋頭糖水 , 椰汁我又麻麻地 , 我比較喜愛濃味的糖水多D , 咁倒不如黑糯米配紅豆 , 味道應該夠濃又飽肚 , 何況紅豆沙係我最愛的中式糖水之一



黑糯米同紅豆的份量可以自由配搭 , 如果大家喜愛黑糯米味重的 , 咪黑糯米份量多過紅豆囉 , 但如果大家好似我咁想紅豆味重d , 就紅豆份量多過黑糯米喇 , 再加埋果皮一齊煲 , 味道好夾 , 呢款糖水食唔晒仲可以放入雪櫃凍食 , 所以袁太都煲左一大煲 , 煲好的時候食熱的 , 其餘放入雪櫃留待下次食 , 黑糯米有咬口 , 紅豆又起沙 , 雖然好味 , 不過食兩碗都頂晒胃呢 ^^



材料 : 黑糯米 , 紅豆 , 果皮 , 蓮子 , 冰糖 , 隔篩 , 水

紅豆放入大碗內用水清洗兩次後加水浸過面靜待5小時 (或可浸過夜) , 浸好的紅豆再沖洗多次及瀝乾 , 黑糯米亦用水沖洗及瀝乾 , 果皮沖洗刮去囊撕成細片

將紅豆放入煲內用中火炒數分鐘 , 加入約50ml水拌炒紅豆至收乾水份 , 再加入第二次水 (同是50ml) , 繼續用中火炒至水份收乾 , 再放入黑糯米 , 果皮及適量水 , 拌勻用中火煲15分鐘後 , 去掉面上泡泡

 

蓋上蓋轉慢火煲1小時至黑糯米及紅豆腍身 (期間要定時睇火 , 小心滾瀉) , 蓮子沖洗乾淨 , 加水浸30分鐘

1小時後將已煲至腍身的紅豆盛起 (只盛起1/3份量就可以) , 用隔篩整成紅豆蓉狀 , 再放回煲內 , 再加入蓮子拌勻蓋上蓋繼續用慢火煲30分鐘

最後加入冰糖拌勻轉用中火煮至溶 , 熄火焗30分鐘即可

 

材料
黑糯米2湯匙 , 紅豆250g , 果皮2塊 , 蓮子 , 冰糖 , 隔篩 , 水



做法
1. 紅豆放入大碗內用水清洗兩次後加水浸過面靜待5小時 (或可浸過夜) 

2. 浸好的紅豆再沖洗多次及瀝乾 , 黑糯米亦用水沖洗及瀝乾 , 果皮沖洗刮去囊撕成細片 

3. 將紅豆放入煲內用中火炒數分鐘 , 加入約50ml水拌炒紅豆至收乾水份 

4. 再加入第二次水 (同是50ml) , 繼續用中火炒至水份收乾

5. 再放入黑糯米 , 果皮及適量水 , 拌勻用中火煲15分鐘後 , 去掉面上泡泡 

6. 蓋上蓋轉慢火煲1小時至黑糯米及紅豆腍身 (期間要定時睇火 , 小心滾瀉)

7. 蓮子沖洗乾淨 , 加水浸30分鐘 

8. 1小時後將已煲至腍身的紅豆盛起 (只盛起1/3份量就可以) , 用隔篩整成紅豆蓉狀 

9. 再放回煲內 , 再加入蓮子拌勻蓋上蓋繼續用慢火煲30分鐘 

10. 最後加入冰糖拌勻轉用中火煮至溶 , 熄火焗30分鐘即可




咁有益同美味的糖水 , 唔知大家有冇興趣來一碗呢 ^^