2016年12月21日 星期三

[金金黃黃] 紅棗蕃薯糖水拌湯丸




咁多位冬至快樂 , 大家同家人食左冬至飯未呢 , 袁生袁太就上星期已經做左節喇 , 所以一陣就同袁生出街食下飯 , 行下呢 , 冬至離不開要煮下湯丸 , 而每逢秋冬季 , 袁太都好鐘意煲糖水潤一潤 , 蕃薯係袁太非常愛的食物 , 所以好多時我都會整蕃薯糖水 , 今次用蕃薯糖水配湯丸做冬至甜點 , 不過我只會用黃心或橙心蕃薯 , 紫心蕃薯咪攪我呢 ......



每次煲蕃薯糖水一定要落好多薑一齊煲 , 因為我同袁生都愛飲有濃烈薑味的片糖水 , 而且我鐘意加埋湯丸一齊食 , 不過我唔會加有餡的湯丸 , 只會加齋粉團的湯丸 , 記得細細個去婆婆屋企食湯丸 , 婆婆例牌會自己搓粉團做湯丸 , 每次只會做兩款 , 圓碌碌的湯丸係包上片糖碎做餡 , 而冇餡的就會搓成長條型 , 真係好懷念



所以我就只用糯米粉加水搓成長型的冇餡湯丸 , 連同蕃薯一起整成糖水 , 糖水金金黃黃 , 賣相靚靚 , 又有我至愛的蕃薯同湯丸 , 又有薑味重得黎甜甜地的片糖水 , 又飽肚又滿足呢 ^^



材料 : 蕃薯 , 薑 , 紅棗 , 冇餡長湯丸 , 片糖 , 水 , 隔篩




蕃薯去皮切件 , 薑去皮切絲 , 紅棗去核 , 蕃薯放入大碗內加水浸過面靜待30分鐘 , 倒去水份後用水沖一沖洗及瀝乾











煲內放入紅棗及薑絲 , 加入2000ml水用中火煮滾 , 蓋上蓋煮10分鐘後再加入蕃薯拌勻煮滾 , 再蓋上蓋轉慢火煮15分鐘













 

煲15分鐘後加入片糖拌勻 , 見片糖開始溶就熄火 , 蓋上蓋焗5分鐘至片糖完全溶掉








最後加入湯丸拌勻用中火煮數分鐘至湯丸熟透浮面即可













材料
蕃薯3個 , 薑 , 紅棗6粒 , 冇餡長湯丸 , 片糖2磚 , 水2000ml , 隔篩



做法
1. 蕃薯去皮切件 , 薑去皮切絲 , 紅棗去核 

2. 蕃薯放入大碗內加水浸過面靜待30分鐘 , 倒去水份後用水沖一沖洗及瀝乾

3. 煲內放入紅棗及薑絲 , 加入2000ml水用中火煮滾

4. 蓋上蓋煮10分鐘後再加入蕃薯拌勻煮滾 , 再蓋上蓋轉慢火煮15分鐘

5. 煲15分鐘後加入片糖拌勻

6. 見片糖開始溶就熄火 , 蓋上蓋焗5分鐘至片糖完全溶掉

7. 最後加入湯丸拌勻用中火煮數分鐘至湯丸熟透浮面即可 




金金黃黃的蕃薯糖水 , 甜甜潤潤 , 令我食完一碗再一碗呢 ^^




27 則留言:

  1. Elaine :團團圓圓,冬節快樂!

    回覆刪除
  2. 呢款糖水好靚,蕃薯同糖水的顏色都好靚,袁生袁太冬至快樂,袁太繼續煮多多好的食物同大家分享

    回覆刪除
    回覆
    1. 好呀,我仲有好多食譜都未上傳架,一定會同大家分享呢

      刪除
  3. 我都好鐘意蕃薯糖水呀

    回覆刪除
  4. 片糖水的顏色好靚,我都要一碗呀唔該

    回覆刪除
  5. 點解你屋企會搓長型湯丸呢`??

    回覆刪除
    回覆
    1. 因為以前婆婆只會包兩款,片糖餡同冇餡,片糖餡就包圓肉,冇餡就包長型,容易睇得出,所以久而久之都跟婆婆咁樣包

      刪除
  6. 顏色好靚啊, 我都喜歡黃肉多, 冬至快樂!

    回覆刪除
  7. 幾好喎無餡, 唔會咁漏!
    我阿婆都係會整片糖湯圓, 好懷念!

    回覆刪除
    回覆
    1. 婆婆整的每一樣野都值得我去懷念呢

      刪除
  8. 哩個糖水好飽肚呀XDD
    預祝袁生袁太聖誕快樂~~~

    回覆刪除

老行家官燕蘋果玫瑰果醬食譜 ~蘋果果醬麵包卷~

繼續同大家分享老行家品牌官燕果醬禮盒食譜 , 繼續分享蘋果玫瑰果醬 , 之前就用來製作雞扒 , 美味滿分兼袁生相當滿意後 , 今次就用來配上白方包製作甜點 , 用來作下午茶就最適合 , 而且材料同製作亦非常簡單 ......