滷水豬手

最近食慣左宵夜 , 因為袁生晚晚趕圖 , 經常叫我整定宵夜俾佢食 , 今次要求要食豬手 , 仲要求用滷水整 , 其實滷水同豉油都一樣咁簡單 , 一早起床整定由佢浸 , 浸到食的時候先微微翻熱 , 入晒味 , 好有膠質兼啖啖肉 ......



其實袁生以前係唔食豬手 , 因為他最怕食有骨的肉類 , 例如牛展呀 ~~ 牛腩呀 ~~~ 手撕雞呢幾類冇骨的肉類他就最愛 , 咁點解佢會突然食左屎咁喜歡食豬手呢 ???



就要講回上個月的時候 , 事緣某日相約媽咪爹地食晚飯 , 媽咪知我喜愛食豬手 , 就叫左碟唔記得係咩名小菜 , 總知就係有豬手係入面 , 媽咪亦知袁生唔食就偏要佢食一舊 , 袁生係極度唔願意的情況下只有食 , 但食完佢又覺得唔錯 , 仲好自然食多左幾舊 , 從此之後袁生就將豬手從冷宮裡釋放出黎 , 仲要求我整豬手俾佢食添



今次呢個豬手依然係急凍店買 , 平時我好少會去豬肉檔買新鮮既 , 簡單將豬手出水 , 放入滷水汁內滷40分鐘就熄火焗呀焗 , 焗到晚餐或宵夜時段先食 , 數數下都浸左好多粒鐘 , 真係好入味好夠味呢 ^^



材料 : 急凍豬手 , 滷水料 , 薑 , 冰糖 , 蔥 , 鹽 , 酒 , 水 

蔥切段 , 薑去皮切幼條 , 將滷水料放入煲內 , 加入一半份量薑絲 , 冰糖 , 調味料 , 鹽及2000ml水拌勻 , 用中火煮至微滾及冰糖溶掉後 , 拌一拌勻煲內材料再蓋上蓋轉慢火煮30分鐘

煮滷水汁期間鑊中放入水 , 蔥段 , 酒及餘下一半份量薑絲 , 放入豬手蓋上蓋用中火出水10分鐘

出水後將豬手盛起用水沖洗及瀝乾 , 放入大碗內加入冰水浸過面靜待10分鐘 , 再倒去水份及瀝乾

將豬手放入滷水汁內拌勻轉中火煮滾 , 再蓋上蓋轉用慢火煮40分鐘 , 熄火由佢焗至入味(如沒有時間 , 最少都要烚2小時) , 食前將豬肉放入另一煲內 , 放入月桂葉及八角 , 再用隔篩將滷水汁淋在豬手內 , 放上芫茜裝飾即可

材料
急凍豬手1 1/2磅 , 滷水料1包 , 薑 , 冰糖 , 蔥 , 鹽 , 酒 , 水2000ml  

調味料
生抽5湯匙 , 老抽3湯匙 , 紹酒3湯匙



做法
1. 蔥切段 , 薑去皮切幼條

2. 將滷水料放入煲內 , 加入一半份量薑絲 , 冰糖 , 調味料 , 鹽及2000ml水拌勻 

3. 用中火煮至微滾及冰糖溶掉後 , 拌一拌勻煲內材料再蓋上蓋轉慢火煮30分鐘

4. 煮滷水汁期間鑊中放入水 , 蔥段 , 酒及餘下一半份量薑絲

5. 放入豬手蓋上蓋用中火出水10分鐘

6. 出水後將豬手盛起用水沖洗及瀝乾 , 放入大碗內加入冰水浸過面靜待10分鐘

7. 再倒去水份及瀝乾

8. 將豬手放入滷水汁內拌勻轉中火煮滾 , 再蓋上蓋轉用慢火煮40分鐘

9. 熄火由佢焗至入味(如沒有時間 , 最少都要烚2小時)

10. 食前將豬肉放入另一煲內 , 放入月桂葉及八角 

11. 再用隔篩將滷水汁淋在豬手內 , 放上芫茜裝飾即可




滷水豬手當一碟餸又得 , 當小食又得 , 送白粥或用來拌撈麵都得 , 好多選擇呢 ^^