[串串貢] 馬來沙爹雞肉串燒

上次整左黃薑飯之後 , 又想繼續整另一款的東南亞食物 ~串燒~ , 串燒可以用雞 , 用豬 , 用蝦 , 用羊都得 , 不過我最鐘意都係用雞 , 而且最鐘意用雞脾肉黎整 ......



今次呢個串燒用上五種香料一齊醃 , 包括有黃薑粉 , 咖哩粉 , 小茴香粉 , 辣椒粉同芫荽粉 , 醃雞的時候已經聞到好香的香料味道 , 將雞雞醃一晚入晒味 , 再用竹簽串起 , 先將雞串放入鑊中煎至微黃先再入爐焗 , 再掃上蜜糖 , 真係超好味 , 雞肉嫩滑 , 而且好入味 , 辣辣地又好鬼死香 , 之後袁太醒起唔記得買菠蘿 , 我平時好鐘意用煎串燒的汁再煎番個菠蘿 , 咁個菠蘿就會好好味架 , 咁就拿拿臨去超市買左pack回家

 

食串燒又點可以冇沙爹醬呢 , 自己整沙爹醬就太麻煩喇 , 我一向都係鐘意用沙爹磚 , 呢款沙爹磚又係東南亞材料店買

 

買回家簡單用半磚再加熱水拌勻就用得 , 好方便 , 用來配串燒就最正呢 ^^

 

材料 : 雞脾肉 , 鹽 , 黃糖 , 咖哩粉 , 麻油 , 辣椒粉 , 小茴香粉 , 芫荽粉 , 洋蔥 , 黃薑粉 , 雞粉 , 竹簽 , 沙爹醬 , 錫紙

雞睥肉切細件 , 洋蔥去衣切碎 , 將雞睥肉放入大碗內 , 先加入鹽 , 黃糖 , 雞粉 , 麻油拌勻靜待10分鐘 , 再加入黃薑粉 , 咖哩粉 , 其他香料 (辣椒粉 , 小茴香粉 , 芫荽粉) 及洋蔥拌勻 , 用手按摩下d雞脾肉令其入味 , 蓋上保鮮紙放入雪櫃下層靜待一晚 (如唔想醃一晚 , 亦最少醃六小時至入味)

翌日將已醃一晚的雞脾肉放回室溫靜待10分鐘 , 蜜糖加少許水拌勻 , 竹簽浸水10分鐘 , 焗盆放上錫紙 , 10分鐘後將竹簽抹乾水份

  

將醃好的雞肉逐一穿在竹簽上 , 期間焗爐用200C預熱10分鐘 , 燒紅鑊 , 將雞串用慢火煎至兩面至微黃色後盛起 , 排放在錫紙上

放入焗爐用180C上下火焗20分鐘 , 焗10分鐘後取出將串燒反轉另一面 , 再入焗爐繼續用180C焗10分鐘 , 再取出將串燒每面掃上蜜糖水 , 再入焗爐轉200C上火 , 每面焗多5分鐘 , 最後將菠蘿片切粒 , 放入之前煎串燒鑊中用慢火煎至金黃色 , 沙爹醬加入適量熱水拌勻成醬汁即可 

材料
雞脾肉400g , 鹽 , 黃糖 , 咖哩粉 , 麻油 , 辣椒粉 , 小茴香粉 , 芫荽粉 , 洋蔥1個 , 黃薑粉 , 雞粉 , 竹簽8支 , 沙爹醬 , 錫紙 

做法
1. 雞睥肉切細件 , 洋蔥去衣切碎 

2. 將雞睥肉放入大碗內 , 先加入鹽 , 黃糖 , 雞粉 , 麻油拌勻靜待10分鐘

3. 再加入黃薑粉 , 咖哩粉 , 其他香料 (辣椒粉 , 小茴香粉 , 芫荽粉) 及洋蔥拌勻 

4. 用手按摩下d雞脾肉令其入味 

5. 蓋上保鮮紙放入雪櫃下層靜待一晚 (如唔想醃一晚 , 亦最少醃六小時至入味)

6. 翌日將已醃一晚的雞脾肉放回室溫靜待10分鐘 , 蜜糖加少許水拌勻

7. 竹簽浸水10分鐘 , 焗盆放上錫紙 , 10分鐘後將竹簽抹乾水份 

8. 將醃好的雞肉逐一穿在竹簽上 , 期間焗爐用200C預熱10分鐘 

9. 燒紅鑊 , 將雞串用慢火煎至兩面至微黃色後盛起 , 排放在錫紙上 

10. 放入焗爐用180C上下火焗20分鐘 

11. 焗10分鐘後取出將串燒反轉另一面 , 再入焗爐繼續用180C焗10分鐘 

12. 再取出將串燒每面掃上蜜糖水 , 再入焗爐轉200C上火 , 每面焗多5分鐘 

13. 最後將菠蘿片切粒 , 放入之前煎串燒鑊中用慢火煎至金黃色 

14. 沙爹醬加入適量熱水拌勻成醬汁即可 




無論串燒 , 沙爹醬同菠蘿都好好味 , 整左八串就唔夠食呢 ^^